ନୂଆଦିଲ୍ଲୀ: ଆଫଗାନିସ୍ତାନରେ ବଢୁଥିବା ହିଂସା ମଧ୍ୟରେ ଜାତିସଂଘ ସୁରକ୍ଷା ପରିଷଦ (ୟୁଏନଏସସି)ରେ ପାକିସ୍ତାନକୁ ଟାର୍ଗେଟ କରିଛି ଭାରତ । ପାକିସ୍ତାନର ନାଁ ନ ନେଇ ଏହାକୁ ଆତଙ୍କବାଦୀଙ୍କ ଆଶ୍ରୟସ୍ଥଳୀ ବୋଲି ଭାରତ ଦେଇଛି ବୟାନ ।
ଜାତିସଂଘରେ ଭାରତର ସ୍ଥାୟୀ ପ୍ରତିନିଧୀ ତଥା ଅଗଷ୍ଟ ମାସ ପାଇଁ ସୁରକ୍ଷା ପରିଷଦର ସଭାପତି ଟି.ଏସ ତିରୁମୁର୍ତ୍ତୀ କହିଛନ୍ତି ଯେ ଆତଙ୍କବାଦୀଙ୍କୁ ଆଶ୍ରୟ ଦେଉଥିବା ଦେଶର ଦାୟିତ୍ବ ନିର୍ଦ୍ଧାରଣ କରିବାର ଆବଶ୍ୟକତା ରହିଛି । ଭାରତର ସ୍ପଷ୍ଟ ବାର୍ତ୍ତା ହେଉଛି ଆଫଗାନିସ୍ତାନରେ ହୋଇଥିବା ହିଂସା ପଛରେ ପାକିସ୍ତାନର ଆତଙ୍କବାଦୀଙ୍କୁ ଆଶ୍ରୟ ଦେବା ଏକ ପ୍ରମୁଖ କାରଣ ।
ଟିଏସ ତିରୁମୁର୍ତ୍ତୀ କହିଛନ୍ତି, ଆଫଗାନିସ୍ତାନରେ ସ୍ଥାୟୀ ଶାନ୍ତି ପାଇଁ ଏହି ଅଞ୍ଚଳରେ ଥିବା ଆତଙ୍କବାଦୀଙ୍କ ସୁରକ୍ଷିତ ଆଡ୍ଡାକୁ ତୁରନ୍ତ ନଷ୍ଟ ଆବଶ୍ୟକ। ଆତଙ୍କବାଦୀଙ୍କ ଯୋଗାଣ ଚେନ୍ ଭାଙ୍ଗିବାର ଆବଶ୍ୟକତା ରହିଛି । ଆଫଗାନିସ୍ତାନର ପଡୋଶୀ ଦେଶଗୁଡିକ ଆତଙ୍କବାଦ, ବିଚ୍ଛିନ୍ନତାବାଦ ଏବଂ ଉଗ୍ରବାଦରୁ କୌଣସି ବିପଦର ସମ୍ମୁଖୀନ ହେବେ ନାହିଁ ବୋଲି ସୁନିଶ୍ଚିତ କରିବା ଦରକାର ।
ଶୁକ୍ରବାର ଭାରତର ଅଧ୍ୟକ୍ଷତାରେ ଅନୁଷ୍ଠିତ ସୁରକ୍ଷା ପରିଷଦର ଜରୁରୀ ବୈଠକରେ ଆଫଗାନିସ୍ତାନର ପରିସ୍ଥିତି ଉପରେ ଆଲୋଚନା ହୋଇଥିଲା। ଆଫଗାନିସ୍ତାନର ବୈଦେଶିକ ମନ୍ତ୍ରୀ ମହମ୍ମଦ ହନିଫ ସୁରକ୍ଷା ପରିଷଦରେ ଦେଶର ପରିସ୍ଥିତି ଉପରେ ତୁରନ୍ତ ଆଲୋଚନା କରିବାକୁ ଦାବି କରିଥିଲେ।
