ରାୟପୁର: ଛତିଶଗଡରେ ସିଲଗେର ଜଙ୍ଗଲରେ ସୁରକ୍ଷାକର୍ମୀ-ନକ୍ସଲଙ୍କ ମଧ୍ୟରେ ଗୁଳି ବିନିମୟ ହୋଇଛି । ଏଥିରେ 22ଜଣ ଯବାନ ଶହୀଦ ହୋଇଥିବାବେଳେ 31ଜଣ ଆହତ ହୋଇଛନ୍ତି । ଏବେ ବି ଅନେକ ଯବାନ ନିଖୋଜ ଥିବା ସୂଚନା ଦେଇଛି ଛତିଶଗଡ ପୋଲିସ ।
ଛତିଶଗଡରେ ସୁରକ୍ଷାକର୍ମୀ-ନକ୍ସଲ ଗୁଳିବିନିମୟ
ମିଳିଥିବା ସୂଚନା ଅନୁସାରେ ଛତିଶଗଡର ସିଲଗେର ଜଙ୍ଗଲରେ ନକ୍ସଲ କ୍ୟାମ୍ପ କରିଥିବା ସୂଚନା ମିଳିବା ପରେ ସେଠାରେ ଡିଆରଜି ଓ ସିଆରପିଏଫ ପକ୍ଷରୁ ମିଳିତ କୁମ୍ବିଂ ଅପରେସନକୁ ଜୋରଦାର କରାଯାଇଥିଲା । ପରେ ନକ୍ସଲ ଓ ସୁରକ୍ଷାବାହିନୀ ମଧ୍ୟରେ ଗୁଳିବିନିମୟ ହୋଇଥିଲା । ଏଥିରେ 22 ଯବାନ ଶହୀଦ ହୋଇଥିବା ବେଳେ ଏବେ ବି ଅନେକ ଜଣ ନିଖୋଜ ଅଛନ୍ତି । ସେହିପରି ସୁରକ୍ଷାକର୍ମୀଙ୍କ ଗୁଳିରେ ନକ୍ସଲ ଛତ୍ରଭଙ୍ଗ ଦେଇଥିଲେ । ଏଥିରେ ଅନେକ ନକ୍ସଲ ମୃତାହତ ହୋଇଥିବାବେଳେ ଜଣେ ମହିଳା ନକ୍ସଲଙ୍କ ମୃତଦେହ ଜବତ କରିଛି ପୋଲିସ । ଏନକାଉଣ୍ଟରରେ ଆହତ ହୋଇଥିବା 31ଜଣ ଯବାନଙ୍କ ମଧ୍ୟରୁ 23ଜଣ ବିଜାପୁର ଡାକ୍ତରଖାନା ଓ 8ଜଣଙ୍କୁ ରାୟପୁର ଡାକ୍ତରଖାନାରେ ଭର୍ତ୍ତି କରାଯାଇଛି ।