ହାଇଦ୍ରାବାଦ: ଅରୁଣାଚଳସୀମାରେ ଭାରତ-ଚୀନ ସେନା ମୁହାଁମୁହିଁ ହେବା ଘଟଣାରେ ରାଜନୀତି ଆରମ୍ଭ ହୋଇଯାଇଛି । ସରକାରଙ୍କୁ ଘେରିଛନ୍ତି ବିରୋଧୀ । ଏହାରି ମଧ୍ୟରେ ନରେନ୍ଦ୍ର ମୋଦି ସରକାରଙ୍କୁ ଦାୟୀ କରିଛନ୍ତି AIMIM ମୁଖ୍ୟ ତଥା ହାଇଦ୍ରାବାଦ ସାଂସଦ ଅସଦୁଦ୍ଦିନ ଓଓ୍ବେସୀ (Asaduddin Owaisi accuses Modi govt )। ଘଟଣା 9 ତାରିଖରେ ଘଟିଥିବା ବେଳେ ମୋଦି ସରକାର ଦେଶକୁ ଅନ୍ଧାରରେ ରଖିଥିବା ଓଓ୍ବେସୀ ଅଭିଯୋଗ କରିଛନ୍ତି ।
ଓଓ୍ବେସୀ କହିଛନ୍ତି, ଏହି ଘଟଣା 9 ତାରିଖରୁ ଘଟିଲାଣି, ହେଲେ ସରକାର ଏପର୍ଯ୍ୟନ୍ତ ସଂସଦକୁ ମଧ୍ୟ ଅବଗତ କରିନାହାନ୍ତି । ସୀମାରେ ଘଟିଥିବା ଘଟଣା ଦେଶ ପାଇଁ ଚିନ୍ତାଜନକ । ଦୁଇ ଦେଶର ସେନା ମଧ୍ୟରେ ବଡ ଧରଣର ସଂଘର୍ଷ ଘଟିଛି । ଯାହା ସୁରକ୍ଷା ପ୍ରତି ସତର୍କଘଣ୍ଟି । ହେଲେ ସରକାର ଦୀର୍ଘ 2ଦିନ ହେଲାଣି ଦେଶବାସୀଙ୍କୁ ଘଟଣା ସମ୍ପର୍କରେ ଅନ୍ଧାରରେ ରଖିଛନ୍ତି । ସଂସଦର ଅଧିବେଶନ ଜାରି ରହିଥିବା ବେଳେ ସେମାନେ ସଂସଦକୁ କାହିଁକି ଅବଗତ କଲେ ନାହିଁ ବୋଲି ଓଓ୍ବେସୀ ପ୍ରଶ୍ନ କରିଛନ୍ତି ।