ରାୟପୁର: ଆସନ୍ତାକାଲି ପ୍ରଥମ ପର୍ଯ୍ୟାୟ ବିଧାନସଭା ନିର୍ବାଚନ ହେବାକୁ ଥିବା ଛତିଶଗଡର ଏକ ଗ୍ରାମକୁ ନେଇ ଏବେ ବେଶ ଚର୍ଚ୍ଚା । କାରଣ ଏହି ଗ୍ରାମର ଅବସ୍ଥିତି ଏମିତି ଯେ, ଦୁଇଟି ବିଧାନସଭା କ୍ଷେତ୍ରରେ ଏହି ଗ୍ରାମର ଗ୍ରାମବାସୀ ନିଜ ମତାଧିକାର ସାବ୍ୟସ୍ତ କରିଆସୁଛନ୍ତି । ଗ୍ରାମଟି ହେଉଛି ଦୁର୍ଗ ଓ ରାଜନନ୍ଦଗାଓଁ ଜିଲ୍ଲା ମଧ୍ୟରେ ଥିବା ‘ଅଞ୍ଜୋରା’ ଗ୍ରାମ । ରାଜ୍ୟ ରାଜସ୍ବ ମାନଚିତ୍ରରେ ଏହି ଗ୍ରାମର ଭୌଗଳିକ ଅବସ୍ଥିତି ହିଁ ଏହାକୁ ରାଜନୈତିକ ଭାବେ ବେଶ ଚର୍ଚ୍ଚିତ କରି ଆସିଛି । ପ୍ରତ୍ୟେକ ବର୍ଷ ବିଧାନସଭା ନିର୍ବାଚନରେ ଏହି ଗ୍ରାମର ଗ୍ରାମବାସୀ ଦୁଇଟି ବିଧାୟକ ପ୍ରାର୍ଥୀଙ୍କୁ ଭୋଟ ଦେଇଆସୁଛନ୍ତି ।
ଏହି ଗ୍ରାମକୁ ଏକ ମୁଖ୍ୟ ରାସ୍ତା ଦୁଇଟି ନିର୍ବାଚନ ମଣ୍ଡଳୀ ମଧ୍ୟରେ ବିଭକ୍ତ କରିଛି । ଗ୍ରାମର ଗୋଟିଏ ବିଭାଜିତ ଅଂଶ ରାଜନନ୍ଦଗାଓଁ ନିର୍ବାଚନ କ୍ଷେତ୍ରରେ ଆସୁଥିବା ବେଳେ ଅବଶିଷ୍ଟ ଅଂଶଟି ଦୁର୍ଗ-ଗ୍ରାମୀଣ ବିଧାନସଭା କ୍ଷେତ୍ର ଅଧୀନରେ ଆସୁଛି । ଏହି ଗ୍ରାମଟି ଦୁର୍ଗ ଜିଲ୍ଲା ମୁଖ୍ୟାଳୟରୁ ପ୍ରାୟ 10 କି.ମି ଦୂରରେ ଓ ମୁମ୍ବାଇ-ହାଓ୍ବଡାକୁ ସଂଯୋଗ କରୁଥିବା 53-ନମ୍ବର ଜାତୀୟ ରାଜପଥ କଡରେ ରହିଛି । ତେଣୁ ଏହି ଦୁଇ ବିଧାନସଭା ନିର୍ବାଚନ ମଣ୍ଡଳୀକୁ ସଂଯୋଗ କରୁଥିବା ଏହି ଗ୍ରାମଟି ଯୋଗାଯୋଗ ଦୃଷ୍ଟିରୁ ମଧ୍ୟ ବେଶ ଗୁରୁତ୍ବପୂର୍ଣ୍ଣ । ଅନ୍ୟ ଏକ ଗୁରୁତ୍ବପୂର୍ଣ୍ଣ କଥା ହେଉଛି ଏହି ଗ୍ରାମଟି ଗୋଟିଏ ରାଜସ୍ବ ଗ୍ରାମ ହୋଇଥିଲେ ସୁଦ୍ଧା ପ୍ରଶାସନିକ ଭାବେ ଦୁଇଟି ଗ୍ରାମପଞ୍ଚାୟତ ଅଧୀନରେ ରହିଛି । ଏହି ଦୁଇଟି ଗ୍ରାମପଞ୍ଚାୟତ ଦୁଇଟି ଭିନ୍ନ ବିଧାନସଭା କ୍ଷେତ୍ର ମଧ୍ୟରେ ଆସୁଛି । ଅଞ୍ଜୁରା ଗ୍ରାମପଞ୍ଚାୟତ ଓ ଅଞ୍ଜୁରା (ଖ) ମଧ୍ୟରେ ଏହି ଗ୍ରାମଟି ରହିଛି ।