ଡେରାଡୁନ:ଉତ୍ତରାଖଣ୍ଡର ଗରଓ୍ବଲ ଜିଲ୍ଲା ପୌଡିରେ ବର୍ବରତାର ସବୁ ସୀମା ଟପିଲେ ଉତ୍ୟକ୍ତ ଭିଡ । ଜଙ୍ଗଲରୁ ଧରା ପଡି ଯନ୍ତାରେ ବନ୍ଦଥିବା ଏକ କଲରାପତରିଆ ବାଘକୁ ପୋଡି ହତ୍ୟା କଲେ ଉତ୍ୟକ୍ତ ଗ୍ରାମବାସୀ । ବାଘଟି କାବୁ ହୋଇଥିବା ସୂଚନା ପାଇ ବନ ବିଭାଗ ଟିମ ପହଞ୍ଚିବା ପୂର୍ବରୁ ବାଘକୁ ଯନ୍ତା ଭିତରେ ପୋଡି ହତ୍ୟା କରାଯାଇଛି । ବନ ବିଭାଗ ଟିମ ବାଘର ଅର୍ଦ୍ଧଦଗ୍ଧ ମୃତଦେହ ଜବତ କରି ବ୍ୟବଚ୍ଛେଦ କରିବା ପରେ ନଷ୍ଟ କରିଦେଇଥିବା ସୂଚନା ମିଳିଛି ।
ଘଟଣା ଅନୁସାରେ, ଉକ୍ତ ବାଘଟି କିଛି ଦିନ ହେବ ସ୍ଥାନୀୟ ଜଙ୍ଗଲରେ ଭୟର ବାତାବରଣ ଖେଳାଇଥିଲା । ଚଳିତ ମାସ 15 ତାରିଖରେ ଜଣେ ମହିଳା ବାଘ ଆକ୍ରମଣରେ ପ୍ରାଣ ହରାଇବା ପରେ ସ୍ଥାନୀୟ ଅଞ୍ଚଳରେ ଉତ୍ତେଜନା ପ୍ରକାଶ ପାଇଥିଲା । ତେବେ ଲୋକଙ୍କ ଅଭିଯୋଗ ଆଧାରରେ ବାଘକୁ ଧରି ଅନ୍ୟତ୍ର ସ୍ଥାନାନ୍ତର କରିବା ପାଇଁ ଯନ୍ତା ବସାଇଥିଲା ବନ ବିଭାଗ । ବାଘଟି ଆଜି ଯନ୍ତାରେ ଧରା ପଡିବା ପରେ ବନ ବିଭାଗ ଟିମ ପହଞ୍ଚି ତାକୁ ଉଦ୍ଧାର କରିବା ପୂର୍ବରୁ ଉତ୍ୟକ୍ତ ଗ୍ରାମବାସୀ ଯନ୍ତା ଭିତରେ ହିଁ ବାଘଟିକୁ ପୋଡି ହତ୍ୟା କରିଛନ୍ତି ।