ମୁମ୍ବାଇ: ବଲିଉଡର ବିଗ ବିଙ୍କ ଉପରେ ଏକ ରାୟ ଶୁଣାଇଛନ୍ତି ହାଇକୋର୍ଟ । ମେଗାଷ୍ଟାର ଅମିତାଭ ବଚ୍ଚନଙ୍କ ନାମ, ଫଟୋ ଏବଂ କଣ୍ଠସ୍ବରର ବେଆଇନ ବ୍ୟବହାର ରୋକିବା ପାଇଁ ଜନସାଧାରଣଙ୍କୁ ନିର୍ଦ୍ଦେଶ ଦେଇଛନ୍ତି । ବିନା ଅନୁମତିରେ କିଛି କମ୍ପାନୀ ତାଙ୍କ ନାମ ଏବଂ କଣ୍ଠସ୍ବର ବ୍ୟବହାର କରୁଥିବା ନେଇ ବିଗ ବି ହାଇକୋର୍ଟରେ ଏକ ମାମଲା ଦାଖଲ କରିଥିଲେ । ଏନେଇ ଆଜି ରାୟ ଶୁଣାଇଛନ୍ତି ହାଇକୋର୍ଟ । ଯେଉଁମାନେ ଅଭିନେତାଙ୍କ ବ୍ୟକ୍ତିଗତ ଅଧିକାର କ୍ଷୁର୍ଣ୍ଣ କରୁଛନ୍ତି ସେମାନଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କୋର୍ଟ କହିଛନ୍ତି ।
କଣ ଥିଲା ବିଗ୍ ବିଙ୍କ ଅଭିଯୋଗ ?
ଦିଲ୍ଲୀ ହାଇକୋର୍ଟରେ ଦାଖଲ ହୋଇଥିବା ଏକ ପିଟିସନରେ ଅମିତାଭ ବଚ୍ଚନ କହିଥିଲେ,"ଅନେକ କମ୍ପାନୀ ତାଙ୍କ ନାମ, ସ୍ୱର ଏବଂ ଭାବମୂର୍ତ୍ତିର ଅପବ୍ୟବହାର କରୁଛନ୍ତି । ବିଗତ କିଛି ଦିନ ଧରି ଏସବୁ ଜାରି ରହିଛି । ମୁ ମୋର ବ୍ୟକ୍ତିତ୍ବକୁ ମୋର ବିନା ଅନୁମତିରେ କେହି ବ୍ୟବହାର କରନ୍ତୁ ତାହା ଚାହୁଁନାହିଁ । ଏନେଇ କିଛି ନିୟମ ରହିବା ଆବଶ୍ୟକ ।"
ଦିଲ୍ଲୀ ହାଇକୋର୍ଟର ବଡ ବୟାନ
ଆଜି(ଶୁକ୍ରବାର) ଦିଲ୍ଲୀ ହାଇକୋର୍ଟ ଏହି ମାମଲାର ଶୁଣାଣି କରି ଅମିତାଭଙ୍କ ସପକ୍ଷରେ ରାୟ ଶୁଣାଇଛନ୍ତି । ଜଷ୍ଟିସ୍ ଚାଓ୍ବଲା କର୍ତ୍ତୃପକ୍ଷ ଏବଂ ଟେଲିକମ୍ ସେବା ଯୋଗାଣକାରୀଙ୍କୁ ସଂସ୍ଥାକୁ ମଧ୍ୟ ନିର୍ଦ୍ଦେଶ ଦେଇଛନ୍ତି । ଅମିତାଭ ବଚ୍ଚନଙ୍କ ନାମ, ଫଟୋ ଏବଂ ତାଙ୍କ ବ୍ୟକ୍ତିତ୍ୱକୁ ବିନା ଅନୁମତିରେ ବ୍ୟବହାର କରୁଥିବା ପୋଷ୍ଟକୁ ତୁରନ୍ତ ହଟାଇବାକୁ ନିର୍ଦ୍ଦେଶ ଦେଇଛନ୍ତି କୋର୍ଟ । ନିୟମର ଅବମାନନା କରାଗଲେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଚେତାବନୀ ଦିଆଯାଇଛି ।
କଣ ରହିଥିଲା ମାମଲା ?
କିଛି କମ୍ପାନୀ ଅମିତାଭ ବଚ୍ଚନଙ୍କ ନାମ, ଫଟୋ, ସ୍ୱର ଏବଂ ତାଙ୍କ ବ୍ୟକ୍ତିତ୍ୱକୁ ନିଜ ସ୍ୱାର୍ଥ ପାଇଁ ଅନୁମତି ବିନା ବ୍ୟବହାର କରୁଛନ୍ତି । ତାଙ୍କ ଆବେଦନରେ ଏହାକୁ ବିରୋଧ କରି ଅଭିନେତା ଏହାକୁ ଭୁଲ ବୋଲି କହିଛନ୍ତି । ଏଭଳି କାର୍ଯ୍ୟକଳାପ ଉପରେ ତୁରନ୍ତ ପ୍ରତିବନ୍ଧକ ଲଗାଇବାକୁ ବିଗ୍ ବି ଦାବି କରିଛନ୍ତି । ସୋସିଆଲ ମିଡିଆରେ ବିଗ୍ ବିଙ୍କ ନାମରେ ଏକ ଲଟେରୀ ବିଜ୍ଞାପନ ମଧ୍ୟ ଚାଲିଛି । କେବଳ ଏତିକି ନୁହେଁ ଏହି ବିଜ୍ଞାପନରେ ବିଗ୍ ବିଙ୍କ ଫଟୋ ମଧ୍ୟ ବ୍ୟବହାର କରାଯାଉଛି । ଏହା ସହିତ ଅମିତାଭ ବଚ୍ଚନଙ୍କ ଲୋକପ୍ରିୟତା ସୋ କୌନ ବନେଗା କୋରଡପତିର ଲଗୋ ମଧ୍ୟ ବ୍ୟବହାର ହୋଇଥିବା ଅଭିଯୋଗ ହୋଇଛି। ବିନା ଅନୁମତିରେ ଏସବୁ ହୋଇଥିବାରୁ ଏନେଇ ଅମିତାଭ ଦିଲ୍ଲୀ ହାଇକୋର୍ଟଙ୍କ ଦ୍ବାରସ୍ଥ ହୋଇଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
