ନୂଆଦିଲ୍ଲୀ: ଉତ୍ତରପ୍ରଦେଶର ମିର୍ଜାପୁରରେ ଆଜି କେନ୍ଦ୍ର ଗୃହମନ୍ତ୍ରୀ ଅମିତ ଶାହ ବିଭିନ୍ନ ପ୍ରକଳ୍ପର ଶିଳାନ୍ୟାସ କରିବା ସହ ଉଦଘାଟନ କରିବେ । 150 କୋଟି ଟଙ୍କାର ବିନ୍ଧ୍ୟାଚଲ କରିଡର ପ୍ରକଳ୍ପ (ଭିସିପି)ର ଶିଳାନ୍ୟାସ କରିବେ । ଏହାସହ ୧୬ କୋଟି ଟଙ୍କାର ଏକ ରୋପଓ୍ବେ ପ୍ରୋଜେକ୍ଟର ଉଦଘାଟନ କରିବେ । ଗୃହମନ୍ତ୍ରୀଙ୍କ ସହ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ମଧ୍ୟ ଉପସ୍ଥିତ ରହିବେ । ବାରଣାସୀର କାଶୀ ବିଶ୍ୱନାଥ ଧାମ କରିଡର ପ୍ରକଳ୍ପର ଧାଡ଼ିରେ ବିନ୍ଧ୍ୟାଚଲ କରିଡର ପ୍ରକଳ୍ପ ନିର୍ମାଣ କରାଯାଉଛି।
ଏନେଇ ଗୃହ ମନ୍ତ୍ରୀ ଆଜି ଉତ୍ତରପ୍ରଦେଶ ଗସ୍ତ କରିବେ । ଶାହ ଅପରାହ୍ନରେ ଦେବରୀ ବିମାନବନ୍ଦରରେ ଅପରାହ୍ନ ୨ଟା ୪୦ ମଧ୍ୟରେ ପହଞ୍ଚିବେ ବୋଲି ଆଶା କରାଯାଉଛି । ଏହା ପରେ ସେ ମୁଖ୍ୟମନ୍ତ୍ରୀଙ୍କ ସହିତ ଭୂମି ପୂଜନ ପାଇଁ ବିନ୍ଧ୍ୟାଚଲ ମନ୍ଦିର ଅଭିମୁଖେ ଯିବେ। ମନ୍ଦିରରେ ପୂଜାର୍ଚ୍ଚନା ପରେ ଭୂମି ପୂଜନର ରୀତିନୀତି କରିବେ । ଏହା ପରେ ସେମାନେ ସରକାରୀ ଇଣ୍ଟର କଲେଜ ପଡିଆରେ ପହଞ୍ଚି ସାଧାରଣ ସଭାକୁ ସମ୍ବୋଧିତ କରିବେ । ଏହାସହ ବିନ୍ଧ୍ୟା ସର୍କଲ ପାଇଁ ରୋପୱେ ଉଦଘାଟନ ଏବଂ ଅନ୍ୟାନ୍ୟ ପ୍ରକଳ୍ପର ଶିଳାନ୍ୟାସ କରିବେ ଗୃହମନ୍ତ୍ରୀ । ଏନେଇ ମିର୍ଜାପୁର ଡିଭିଜନାଲ କମିଶନର ସୂଚନା ଦେଇଛନ୍ତି ।
ମନ୍ଦିରର ଭୂମି ପୂଜନ ପରେ ତୁରନ୍ତ ଏହି ପ୍ରକଳ୍ପ ଆରମ୍ଭ ହେବ । ଏହି ପ୍ରକଳ୍ପ ଅଧୀନରେ 50 ଫୁଟ ଚଉଡା ପରିକ୍ରମା ମାର୍ଗ ହେବ। ପର୍ଯ୍ୟଟକମାନଙ୍କୁ ପବିତ୍ର ଶକ୍ତିପୀଠର ପରିଦର୍ଶନ ପାଇଁ ଅନୁମତି ଦିଆଯାଇଛି । ଯାହା ଫଳରେ ଭକ୍ତମାନେ ପୁରା ମନ୍ଦିର ବୁଲି ଦେଖିପାରିବେ । ଏହି ପ୍ରକଳ୍ପର ଏକ ଅଂଶ ଭାବରେ ମନ୍ଦିରକୁ ଯାଉଥିବା ରାସ୍ତା ମଧ୍ୟ ପ୍ରଶସ୍ତ କରାଯାଉଛି । ଏହା ବ୍ୟତୀତ ପାର୍କିଂ ଜୋନ୍, ଗେଷ୍ଟ ହାଉସ୍, ସପିଂ କମ୍ପ୍ଲେକ୍ସ, ତୀର୍ଥଯାତ୍ରୀଙ୍କ ପାଇଁ ସ୍ବତନ୍ତ୍ର କୋଠରୀ ସମେତ ମୌଳିକ ଭିତ୍ତିଭୂମିର ଉନ୍ନତି ତଥା ଆଧୁନିକ ସୁବିଧାଗୁଡ଼ିକ ଯୋଗାଇ ଦିଆଯିବ ।