ଡେରାଡୁନ:ଉତ୍ତରାଖଣ୍ଡ ବିଧାନସଭାରେ ହଟ୍ଟଗୋଳ କରିବା ଓ ଗୃହ କାର୍ଯ୍ୟରେ ଅଚଳାବସ୍ଥା ସୃଷ୍ଟି କରିବା କାରଣରୁ ସମସ୍ତ କଂଗ୍ରେସ ବିଧାୟକଙ୍କୁ ଗୋଟିଏ ଦିନ ପାଇଁ ନିଲମ୍ବିତ କରିଛନ୍ତି ବାଚସ୍ପତି ରିତୁ ଖାଣ୍ଡୁରୀ । ଜାରି ରହିଥିବା ବଜେଟ ଅଧିବେଶନର ଦ୍ବିତୀୟ ଦିବସରେ ଗୃହରେ ହଟ୍ଟଗୋଳ କରିଥିଲେ କଂଗ୍ରେସ ବିଧାୟକ । ଗୃହ କାର୍ଯ୍ୟରେ ଅଚଳାବସ୍ଥା ସୃଷ୍ଟି ହୋଇଥିଲା । ଗୃହକୁ ଅପରାହ୍ନ 3ଟା ଯାଏ ମୁଲତବୀ ଘୋଷଣା କରିବା ସହ ସମସ୍ତ କଂଗ୍ରେସ ବିଧାୟକଙ୍କୁ ଗୋଟିଏ ଦିନ ପାଇଁ ନିଲମ୍ବିନ ନିର୍ଦ୍ଦେଶ ଦେଇଛନ୍ତି ବାଚସ୍ପତି ଖାଣ୍ଡୁରୀ ।
ଆଜି (ମଙ୍ଗଳବାର) ଗୃହରେ ଏକାଧିକ ପ୍ରସଙ୍ଗରେ ବିରୋଧୀ କଂଗ୍ରେସ ସଦସ୍ୟମାନେ ପୁଷ୍କର ସିଂ ଧାମୀ ସରକାରକୁ ଘେରିଥିଲେ । ଚର୍ଚ୍ଚା ବେଳେ ପ୍ରବଳ ହୋହାଲ୍ଲା ଓ ହଟ୍ଟଗୋଳ ମଧ୍ୟ ହୋଇଥିଲା । ଗୃହରେ ସେକେଣ୍ଡ ପ୍ରୋସେଡିଂ ଆରମ୍ଭ ହେବା ପରେ କଂଗ୍ରେସ ସଦସ୍ୟମାନେ ଧାରଣାରେ ବସିବା ସହ ନାରାବାଜୀ କରିଥିଲେ । ରାଜ୍ୟର ଆଖୁ ଚାଷୀଙ୍କୁ ଏମଏସପି ପ୍ରଦାନ ପ୍ରସଙ୍ଗରେ ସେମାନେ ସରକାରକୁ ଘେରିଥିଲେ । ବାଚସ୍ପତିଙ୍କ ପୋଡିଅମ ଆଡକୁ କାଗଜ ଗୁଳା ମଧ୍ୟ ଫିଙ୍ଗା ଯାଇଥିବା ଦେଖିବାକୁ ମିଳିଥିଲା । ଜସପୁର ବିଧାୟକ ଆଣିଥିବା ସ୍ବାଧୀକାର ଭଙ୍ଗ ପ୍ରସ୍ତାବ ଉପରେ ଆଲୋଚନା ଜାରି ରହିଥିବା ବେଳେ କଂଗ୍ରେସ ସଦସ୍ୟମାନେ ହଟ୍ଟଗୋଳ ଓ ନାରାବାଜୀ କରିଥିଲେ । ଗୃହ କାର୍ଯ୍ୟରେ ଅଚଳାବସ୍ଥା ସୃଷ୍ଟି ହୋଇଥିଲା ।