ଲକ୍ଷ୍ନୌ:ଉତ୍ତର ପ୍ରଦେଶର ମୈନପୁରୀ ଲୋକସଭା ଆସନରେ ଉପନିର୍ବାଚନରେ (Mainpuri Lok Sabha by poll) ପ୍ରତିଦ୍ବନ୍ଦ୍ବିତା କରିବେ ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବଙ୍କ ପତ୍ନୀ ଡିମ୍ପଲ ଯାଦବ (Akhilesh Yadav wife Dimple Yadav to contest)। ଏନେଇ ଦଳ ପକ୍ଷରୁ ଟ୍ବିଟ ଯୋଗେ ସୂଚନା ମିଳିଛି । ସମାଜବାଦୀ ପାର୍ଟି ପ୍ରତିଷ୍ଠାତା ମୁଲାୟମ ସିଂ ଯାଦବ ଏହି ସଂସଦୀୟ ଆସନରୁ ସାଂସଦ ଥିଲେ । ଗତମାସରେ ମୁଲାୟମଙ୍କ ଦେହାନ୍ତ ପରେ ଏହି ଆସନ ଖାଲି ପଡିଥିବା ବେଳେ ଏବେ ଉପନିର୍ବାଚନ ଅନୁଷ୍ଠିତ ହେବାକୁ ଯାଉଛି ।
ସାମାଜବାଦୀ ପାର୍ଟି ପ୍ରତିଷ୍ଠାତା ମୁଲାୟନ ସିଂ ଯାଦବ ଗତମାସ (ଅକ୍ଟୋବର) 10 ତାରିଖରେ ଦେହାନ୍ତ ହୋଇଥିଲା । ଗୁରୁଗ୍ରାମର ଏକ ଘରୋଇ ହସ୍ପିଟାଲରେ ସେ ଚିକିତ୍ସାଧୀନ ଅବସ୍ଥାରେ 82ବର୍ଷ ବୟସରେ ଶେଷ ନିଶ୍ବାସ ତ୍ୟାଗ କରିଥିଲେ । ତେବେ ଏହି ସଂସଦୀୟ ଆସନକୁ ସମାଜବାଦୀ ପାର୍ଟିର ଏକ ପାରମ୍ପାରିକ ଗଡ ଭାବେ ମଧ୍ୟ ବିଚାର କରାଯାଏ । ତେବେ ଶଶୁରଙ୍କ ଦେହାନ୍ତ ପରେ ଏହି ପାରମ୍ପାରିକ ଆସନରୁ ବୋହୁ ଡିମ୍ପଲଙ୍କୁ ଦଳ ପକ୍ଷରୁ ଟିକେଟ ପ୍ରଦାନ କରାଯାଇଛି ।