ଚେନ୍ନାଇ: ଦକ୍ଷିଣ ଭାରତ ରାଜନୀତିରେ କେନ୍ଦ୍ରରେ ଶାସନରେ ଥିବା ଭାରତୀୟ ଜନତା ପାର୍ଟିକୁ ଝଟକା ଲାଗିଛି । ବିଜେପି ନେତୃତ୍ବାଧୀନ ଏନଡିଏ ମେଣ୍ଟ ସହ ସମସ୍ତ ସମ୍ପର୍କ ଛିନ୍ନ କରିଛି ତାମିଲନାଡୁର ବିରୋଧୀ ଦଳ ତଥା ବିଜେପିର ଦୀର୍ଘ ସହଯୋଗୀ AIADMK । ନିକଟରେ ରାଜ୍ୟ ବିଜେପି ୟୁନିଟ ମୁଖ୍ୟ କେ.ଆନ୍ନାମଲାଇଙ୍କ ମନ୍ତବ୍ୟ ପରେ ଉଭୟ ଦଳ ମଧ୍ୟରେ ତିକ୍ତତା ଲାଗି ରହିଥିଲା । ଆଜି (ସୋମବାର) ଦଳୀୟ ବୈଠକରେ ଏକ ସଙ୍କଳ୍ପ ପାରିତ କରି ବିଜେପି ଓ ଏନଡିଏ ମେଣ୍ଟରୁ ଦଳ ଓହରିବାକୁ ନିଷ୍ପତ୍ତି ନେଇଥିବା ଦଳର ଉପ ସଂଯୋଜକ କେ.ପି ମୁନୁସାମୀ ଗଣମାଧ୍ୟମରେ ଘୋଷଣା କରିଛନ୍ତି ।
ବୈଠକରେ ସଙ୍କଳ୍ପ ପାରିତ ହେବା ପରେ ଏକ ପ୍ରେସମଟିରେ ମୁନୁସାମୀ କହିଛନ୍ତି,‘‘ ଆଜି ସମସ୍ତ ସଦସ୍ୟଙ୍କ ସମ୍ମତିକ୍ରମେ ପାରିତ ସଙ୍କଳ୍ପରେ AIADMK ବିଜେପି ଓ ଏହାର ନେତୃତ୍ବାଧୀନ ମେଣ୍ଟ ‘ଏନଡିଏ’ ସହ ସମସ୍ତ ସମ୍ପର୍କ ଛିନ୍ନ କରୁଛି । ଦଳର ରାଜ୍ୟ ନେତାମାନେ ନିୟମିତ AIADMK ବହୁ ବରିଷ୍ଠ ତଥା ଦିବଙ୍ଗତ ନେତାଙ୍କ ବିରୋଧରେ ଆପତ୍ତିଜନକ ମନ୍ତବ୍ୟ ଦେଉଛନ୍ତି । ଯାହା ଦଳରେ ଗ୍ରହଣୀୟ ନଥିଲା । ତେଣୁ ଆଜି ଏହି ନିଷ୍ପତ୍ତି ଗ୍ରହଣ କରାଯାଇଛି ।’’
ରାଜ୍ୟ ବିଜେପି ମୁଖ୍ୟ କେ.ଆନ୍ନାମଲାଇ AIADMKର ପ୍ରତିଷ୍ଠାତା ତଥା ପୂର୍ବତନ ମୁଖ୍ୟମନ୍ତ୍ରୀ ରାମଚନ୍ଦ୍ରନ, ତାଙ୍କର ରାଜନୈତିକ ମାର୍ଗଦର୍ଶକ ତଥା ତାମିଲ ରାଜନୀତିର ଭେଟେରାନ ଆନ୍ନାଦୁରାଇଙ୍କ ସମେତ ଏକାଧିକ ନେତାଙ୍କ ବିରୋଧରେ ଆପତ୍ତିଜନକ ଟିପ୍ପଣୀ ଦେଇଥିବା ଅଭିଯୋଗ ହୋଇଥିଲା । ହିନ୍ଦୁତ୍ବ ପ୍ରସଙ୍ଗରେ ଆନ୍ନାମଲାଇ ଏହି ନେତାମାନଙ୍କୁ ଟାର୍ଗେଟ କରିବା ପରେ ଏହାକୁ ନେଇ ବିଜେପି- ଏଆଇଡିଏମକେ ମଧ୍ୟରେ ତିକ୍ତତା ସୃଷ୍ଟି ହୋଇଥିଲା ।