ହାଇଦ୍ରାବାଦ: ଦୀପାବଳିରେ ରିଲିଜ ହେବାକୁ ଯାଉଛି 'ଟାଇଗର-୩' । ଯେଉଁଥିରେ ଲିଡରେ ଅଛନ୍ତି ସଲମାନ ଖାନ ଓ କାଟ୍ରିନା କୈଫ । ଏହାସହ ଇମ୍ରାନ ହାସମିଙ୍କ ଅଭିନୟ ମଧ୍ୟ ଦେଖିବାକୁ ପାଇବେ ଫ୍ୟାନ୍ସ । ସେପଟେ ଟାଇଗର-୩ ପାଇଁ ଆଗୁଆ ବୁକିଂ ମଧ୍ୟ ଜୋରଦାର ଚାଲିଛି । ରିଲିଜ ପୂର୍ବରୁ ହିଁ ବକ୍ସ ଅଫିସରେ କମାଲ କରୁଛି 'ଟାଇଗର-୩' ।
ନିଜର ଟ୍ବିଟର ହ୍ୟାଣ୍ଡେଲ (X)ରେ ଟ୍ବିଟ୍ କରି ସଲମାନ ଖାନ ଲେଖିଛନ୍ତି, "ଆମେ 'ଟାଇଗର-୩'କୁ ଖୁବ ଉତ୍ସାହର ସହ ଦର୍ଶକଙ୍କ ଭରପୂର ମନୋରଞ୍ଜନ ପାଇଁ ତିଆରି କରିଛୁ । ଆମେ ଆଶା କରୁଛୁ ଯେ, 'ଟାଇଗର-୩' ଆପଣମାନଙ୍କ ପାଇଁ ଏକ ସୁନ୍ଦର ଦୀପାବଳି ଭେଟି ହେବ । ଏଥିରେ ଅଭିନୟ କରିଥିବା ଅଭିନେତା ଓ ଅଭିନେତ୍ରୀଙ୍କ ଠାରୁ ଆରମ୍ଭ କରି ଅନ୍ୟ କର୍ମଚାରୀମାନେ ମଧ୍ୟ ଖୁବ ପରିଶ୍ରମ କରିଛନ୍ତି । ହେଲେ କେତେକ ଖଳ ପ୍ରକୃତିର ବ୍ୟକ୍ତିଙ୍କ ପାଇଁ ଅନେକ ସମୟରେ ଫିଲ୍ମ ରିଲିଜ ବେଳେ କ୍ଷତି ସହିବାକୁ ପଡିଥାଏ । ସେମାନେ ଫିଲ୍ମର ଦୃଶ୍ୟ ସବୁ ଅନଲାଇନରେ ଲିକ୍ କରିଥାନ୍ତି । ହେଲେ ଏଥର 'ଟାଇଗର-୩'ର କ୍ଲାଇମାକ୍ସ ଲିକ୍ ନକରିବାକୁ ଅନୁରୋଧ । ଆମେ ଆପଣଙ୍କୁ ବିଶ୍ବାସ କରୁ । ଯାହା ଉଚିତ ସମସ୍ତେ ସେପରି କରିବେ । "