ନୂଆଦିଲ୍ଲୀ: ତାଲିବାନକୁ ରୋକିବା ଏବେ ଆଫଗାନ ସେନା ପାଇଁ ଅସମ୍ଭବ । ଗତକାଲି(ଗୁରୁବାର) ତାଲିବାନ ଦେଶର ଦ୍ବିତୀୟ ବଡ ସହର କାନ୍ଦାହାରକୁ ନିଜ ନିୟନ୍ତ୍ରଣକୁ ନେଇଥିବା ଦାବି କରିଛି । ଆଉ କାନ୍ଦାହାର ହେଉଛି ଦେଶର ପ୍ରାନ୍ତୀୟ ରାଜଧାନୀରୁ ଅନ୍ୟତମ । ଯାହାକୁ ଅନେକ ପ୍ରୟାସ ସତ୍ତ୍ବେ ଆଫଗାନ ସେନା ନିଜ ନିୟନ୍ତ୍ରଣରେ ରଖିବାରେ ବିଫଳ ହୋଇଛି ।
ଗୁରୁତ୍ବପୂର୍ଣ୍ଣ କଥା ହେଉଛି ତାଲିବାନ କାନ୍ଦାହାରକୁ କବଜା କରିବା ପୂର୍ବରୁ ସରକାରୀ ଅଫିସରମାନେ ବିମାନ ଯୋଗେ ସହର ଛାଡି ପଳାଇବାରେ ସକ୍ଷମ ହୋଇଛନ୍ତି । କାନ୍ଦାହାରକୁ ନିଜ କବଜାକୁ ନେବା ତାଲିବାନ ପାଇଁ ସବୁଠାରୁ ବଡ ସଫଳତା । କାନ୍ଦାହାର କବଜା ପରେ କାବୁଲ ବେଶୀ ଦୂର ନଥିବା ଚର୍ଚ୍ଚା ହେଉଛି। ଆଫଗାନ ସରକାରୀ ଅଧିକାରୀଙ୍କ ସୂଚନା ଅନୁସାରେ ଗୋଟିଏ ସପ୍ତାହର ଘମାଘୋଟ ଲଢେଇ ପରେ ତାଲିବାନ ଆଫଗାନର ୩୪ ପ୍ରାନ୍ତୀୟ ରାଜଧାନୀରୁ ୧୧ ଟିକୁ କବଜା କରିବାରେ ସଫଳ ହୋଇଛି ।