ଗାନ୍ଧୀନଗର:ଗୁଜରାଟରେ ବଡ ନିବେଶ ଘୋଷଣା କରିଲା ଆଦାନୀ ଗ୍ରୁପ । 2025 ସୁଦ୍ଧା ଗୁଜୁରାଟରେ 55000 କୋଟି ଟଙ୍କା ନିବେଶ କରିବା ନେଇ ଆଦାନୀ ଗ୍ରୁପ ପକ୍ଷରୁ ଘୋଷଣା କରାଯାଇଛି । ଗୁଜୁରାଟରେ ଆଗାମୀ 5 ବର୍ଷ ମଧ୍ୟରେ 2 ଲକ୍ଷ କୋଟି ଟଙ୍କା ବିନିଯୋଗ କରିବ ଆଦାନୀ ଗ୍ରୁପ । ଏନେଇ ଆଜି(ବୁଧବାର) ଭାଇବ୍ରାଣ୍ଟ ଗୁଜୁରାଟ ଗ୍ଲୋବାଲ ସମ୍ମିଳନୀରେ ଘୋଷଣା କରିଛନ୍ତି ଆଦାନୀ ଗ୍ରୁପ ଚେୟାରମ୍ୟାନ ଗୌତମ ଆଦାନୀ ।
ଭାଇବ୍ରାଣ୍ଟ ଗୁଜୁରାଟ ଗ୍ଲୋବାଲ ସମ୍ମିଳନୀରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସମେତ କେନ୍ଦ୍ରମନ୍ତ୍ରୀ ଏବଂ ବିଶ୍ବର ଅନେକ ବ୍ୟବସାୟୀମାନେ ଯୋଗଦାନ କରିଥିଲେ । ତେବେ ଆଦାନୀ ଘୋଷଣା କରିଥିବା ଏହି ନିବେଶ ଗୁଜରାଟରେ ନୂଆ ଚାକିରି ସୃଷ୍ଟି କରିବା ନେଇ ଆଶା କରାଯାଉଛି । ଆଦାନୀ ଗ୍ରୁପର ଏହି ବିନିଯୋଗ ଗୁଜରାଟରେ 1 ଲକ୍ଷରୁ ଅଧିକ ନିଯୁକ୍ତି ସୃଷ୍ଟି କରିବ ।
2047 ସୁଦ୍ଧା ହେବ ବିକଶିତ ଭାରତ:ଭାଇବ୍ରାଣ୍ଟ ଗୁଜୁରାଟ ଗ୍ଲୋବାଲ ସମ୍ମିଳନୀରେ ଯୋଗଦେଇ ଗୌତମ ଆଦାନୀ କହିଛନ୍ତି, "ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କେବଳ ଭାରତର ଭବିଷ୍ୟକ ବିଷୟରେ ଚିନ୍ତା କରୁନାହାନ୍ତି ବରଂ ଏହାକୁ ଏକ ଆକାର ମଧ୍ୟ ଦେଇଛନ୍ତି । ପ୍ରଧାନମନ୍ତ୍ରୀଙ୍କ ନେତୃତ୍ବରେ ଭାରତ 2047 ସୁଦ୍ଧା ସମ୍ପୂର୍ଣ୍ଣ ବିକଶିତ ହେବ । ବିଶ୍ବ ମାନଚିତ୍ରରେ ଭାରତ ଏକ ସଫଳତାର ସହିତ ପ୍ରମୁଖ ଶକ୍ତି ଭାବେ ସ୍ଥାନ ପାଇଛି ।"
2014 ପରଠାରୁ ଜିଡିପି 185 ପ୍ରତିଶତ ବୃଦ୍ଧି:ଗତ ଦଶନ୍ଧିରେ ସଂଖ୍ୟା ବହୁତ ଭଲ ରହିଛି । 2014 ପରଠାରୁ ଭାରତର ଜିଡିପି(ମୋଟ ଘରୋଇ ଉତ୍ପାଦ) 185 ପ୍ରତିଶତ ବୃଦ୍ଧି ପାଇଛି । ଏଥିସହିତ ମୁଣ୍ଡପିଛା ଆୟ ମଧ୍ୟ 165 ପ୍ରତିଶତ ବୃଦ୍ଧି ପାଇଛି । ଏହି ଉପଲବ୍ଧି ଅତୁଳନୀୟ । ମହାମାରୀ ଏବଂ ରାଜନୈତିକ ସଂଘର୍ଷ ଭଳି ଚ୍ୟାଲେଞ୍ଜ ଦେଖାଯାଇଥିଲେ ହେଁ ଭାରତର ଅଭିବୃଦ୍ଧି ହୋଇଛି ବୋଲି ଭାଇବ୍ରାଣ୍ଟ ଗୁଜରାଟ ଗ୍ଲୋବାଲ ସମ୍ମିଳନୀକୁ ସମ୍ବୋଧିତ କରି କହିଛନ୍ତି ଗୌତମ ଆଦାନୀ ।