ବେଙ୍ଗାଲୁରୁ: କର୍ଣ୍ଣାଟକର ମହୀଶୂରରୁ ଏକ ଦୁଃଖଦ ଘଟଣା ସାମ୍ନାକୁ ଆସିଛି । ଜିଲ୍ଲାର ଏଚଡି ତାଲୁକ ଅଞ୍ଚଳରେ ଗତକାଲି(ସୋମବାର) ବାଘ ଆକ୍ରମଣରେ ଜଣେ ୭ ବର୍ଷୀୟ ନାବାଳକର ମୃତ୍ୟୁ ଘଟିଛି । ପିଲାଟି ଗୋଟିଏ ଗଛ ତଳେ ଖେଳୁଥିବା ବେଳେ ବାଘ ଆସି ତାକୁ ଝାମ୍ପି ନେଇଥିଲା । ବହୁ ଖୋଜାଖୋଜି କରିବା ପରେ ନାବାଳକର ଖଣ୍ଡ ବିଖଣ୍ଡିତ ମୃତଦେହ ଉଦ୍ଧାର କରାଯାଇଥିଲା । ବନ ବିଭାଗର ଅବହେଳା ପାଇଁ ଏହି ଅଭାବନୀୟ ଘଟଣା ଘଟିଥିବା ଅଭିଯୋଗ କରି ସ୍ଥାନୀୟ ଗ୍ରାମବାସୀ ବିକ୍ଷୋଭ ପ୍ରଦର୍ଶନ କରିବା ପରେ ସରକାରଙ୍କ ପକ୍ଷରୁ ମୃତକଙ୍କ ପରିବାରକୁ ୧୫ ଲକ୍ଷ ଟଙ୍କା ଅନୁକମ୍ପା ରାଶି ଘୋଷଣା କରାଯାଇଛି ।
ସୂଚନା ଅନୁଯାୟୀ, ସୋମବାର ଅପରାହ୍ନରେ କାଲାହାଟ୍ଟୀ ଗାଁର କ୍ରିଷ୍ଣା ନାୟକ ଜଣେ ବ୍ୟକ୍ତି ନିଜର ୭ ବର୍ଷର ପୁଅକୁ ନେଇ ବିଲକୁ କାମ କରିବାକୁ ଯାଇଥିଲେ । ସେ ପୁଅକୁ ବିଲ ପାଖରେ ଏକ ଗଛ ତଳେ ଛାଡ଼ି କାମ କରୁଥିଲେ । ପିଲାଟି ସେଠାରେ ଖେଳୁଥିବା ବେଳେ ହଠାତ୍ ଗୋଟିଏ ବାଘ ଆସି ତାକୁ ଟାଣି ନେଇ ଜଙ୍ଗଲକୁ ପଳାଇଥିଲା । କିଛି ସମୟ ପରେ କ୍ରିଷ୍ଣା ନିଜ ପୁଅକୁ ଖୋଜିବାରୁ ଆଉ ପାଇନଥିଲେ । ଏହାପରେ ପରିବାର ଲୋକେ ଏବଂ ଗ୍ରାମବାସୀ ମିଶି ବହୁ ଖୋଜାଖୋଜି କରିବା ପରେ ନାବାଳକର ମୃତଦେହ ମିଳିଥିଲା । ବାଘ ପିଲାଟିର ଶରୀରର ଅନେକ ଅଂଶକୁ ଖାଇ ଯାଇଥିବା ଦେଖିବାକୁ ମିଳିଥିଲା । ଏହି ଅଘଟଣ ପାଇଁ ବନ ବିଭାଗର ଅବହେଳାକୁ ଦାୟୀ କରି ଗାଁ ଲୋକେ ମୃତଦେହକୁ ଚାଷଜମିରେ ରଖି ବିକ୍ଷୋଭ ପ୍ରଦର୍ଶନ କରିଥିଲେ ।