ନୂଆଦିଲ୍ଲୀ:ବିଧାନସଭା ନିର୍ବାଚନ ପୂର୍ବରୁ ପଦ୍ମ ଧରିଲେ ମେଘାଳୟ ବିଧାୟକ । ଗତକାଲି ମେଘାଳୟର ୪ ଜଣ ବିଧାୟକ ଭାରତୀୟ ଜନତା ପାର୍ଟିରେ ସାମିଲ ହୋଇଛନ୍ତି(Four Meghalaya MLAs join BJP) । ସେମାନଙ୍କ ମଧ୍ୟରେ ୨ ଜଣ ଶାସନ ନ୍ୟାସନାଲ ପିପୁଲ୍ସ ପାର୍ଟି(NPP )ର ବେନଡିକ୍ ମାରକ(Benedik Marak), ପରଲିନ୍ ସାଙ୍ଗମା ରହିଥିବା ବେଳେ ସ୍ବାଧୀନ ବିଧାୟକ ସାମୁଏଲ ଏମ ସାଙ୍ଗମା(Samuel M. Sangma) ଓ ଟିଏମସିର ହିମାଳୟା ମୁକ୍ତାନ ସଙ୍ଗପିଲାଙ୍ଗ ମଧ୍ୟ ସାମିଲ ଅଛନ୍ତି । ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା ଓ ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ବଶର୍ମାଙ୍କ ଉପସ୍ଥିତିରେ ୪ ଜଣ ବିଧାୟକ ଦଳରେ ସାମିଲ ହୋଇଛନ୍ତି ।
ଆସନ୍ତା ବର୍ଷ ମେଘାଳୟ ବିଧାନସଭା ନିର୍ବାଚନ ହେବାକୁ ଯାଉଛି । ଏହାପୂର୍ବରୁ ୪ ବିଧାୟକ ବିଜେପିରେ ଯୋଗ ଦେଇଛନ୍ତି । ଏନେଇ ଆସାମ ମୁଖ୍ୟମନ୍ତ୍ରୀ ବିଶ୍ବଶର୍ମା କହିଛନ୍ତି, ''ନରେନ୍ଦ୍ର ମୋଦି ସରକାରରେ ଉତ୍ତର-ପୂର୍ବର ୮ଟି ରାଜ୍ୟରେ ୨୦୧୪ ମସିହା ପରଠାରୁ ବଡ ପରିବର୍ତ୍ତନ ଆସିଛି । ଏହି ରାଜ୍ୟ ଗୁଡିକ ପ୍ରତିଟି କ୍ଷେତ୍ରରେ ଅଗ୍ରଗତି ହାସଲ କରିଛି ।'' ଏହାସହିତ ମେଘାଳୟ, ତ୍ରିପୁରା ଓ ନାଗାଲାଣ୍ଡରେ ଆଗାମୀ ଦିନରେ ହେବାକୁ ଥିବା ନିର୍ବାଚନରେ ବିଜେପି ବିଜୟୀ ହେବ ବୋଲି ବିଶ୍ବଶର୍ମା ଦମ୍ଭୋକ୍ତି ପ୍ରକାଶ କରିଛନ୍ତି ।