କୋଲକାତା: ପଶ୍ଚିମବଙ୍ଗ ବୀରଭୂମରେ ହୋଇଥିବା ବହୁଚର୍ଚ୍ଚିତ ରାଜନୈତିକ ଗଣହତ୍ୟାକାଣ୍ଡରେ କେନ୍ଦ୍ରୀୟ ତଦନ୍ତ ବ୍ୟୁରୋ (CBI) ପକ୍ଷରୁ ଜାରି ରହିଥିବା ତଦନ୍ତରେ ୨୧ଜଣଙ୍କୁ ଅଭିଯୁକ୍ତ ଦର୍ଶାଯାଇଛି । ତେବେ ସୂତ୍ରରୁ ମିଳିଥିବା ସୂଚନା ଅନୁସାରେ, ରାଜ୍ୟ ପୋଲିସ ତଦନ୍ତ ବେଳେ ପ୍ରସ୍ତୁତ କରିଥିବା ଅଭିଯୁକ୍ତଙ୍କ ତାଲିକା ସହ ଏହି ତାଲିକା ମଧ୍ୟ ପ୍ରାୟ ସମାନ ରହିଛି । ତେବେ ଅନ୍ୟ ଏକ ଗୁରୁତ୍ବପୂର୍ଣ୍ଣ ସୂଚନ ହେଉଛି, କିଛି ସ୍ଥାନୀୟ ତୃଣମୂଳ କଂଗ୍ରେସ ନେତାଙ୍କୁ ମଧ୍ୟ ତଦନ୍ତ ପରିସରଭୁକ୍ତ କରିଛି ସିବିଆଇ ।
ସୂଚନା ଅନୁସାରେ ଏହି ନେତାଙ୍କ ମଧ୍ୟରେ ଟିଏମସିର ସ୍ଥାନୀୟ ମଣ୍ଡଳ ସଭାପତି ଅନାରୁଲ ହୁସେନ ମଧ୍ୟ ଜେରାର ସମ୍ମୁଖୀନ ହୋଇଛନ୍ତି । ତେବେ ମମତା ବାନାର୍ଜୀ ଘଟଣାସ୍ଥଳ ପରିଦର୍ଶନ କରିବାବେଳେ ଏଥିରେ ସାମିଲ ଥିବା ସମସ୍ତେ ଗିରଫ ହେବେ ବୋଲି କହିଥିଲେ । ଆଜି ତୃଣମୂଳ କଂଗ୍ରେସର ସ୍ଥାନୀୟ ନେତାଙ୍କୁ ଜେରା କରିଛି ସିବିଆଇ । ଜେରାର ସମ୍ମୁଖୀନ ଟିଏମସି ନେତା କିନ୍ତୁ ଏଥିରେ ସମ୍ପୃକ୍ତ ନଥିବା ଓ ଏହା ତାଙ୍କ ବିରୋଧରେ ଏକ ରାଜନୈତିକ ଷଡଯନ୍ତ୍ର ବୋଲି ସଫେଇ ଦେଇଛନ୍ତି ।