ନୂଆଦିଲ୍ଲୀ: ରାତି ପାହିଲେ ସ୍ବାଧୀନତା ଦିବସ । ସ୍ବାଧୀନ ଭାରତକୁ ପୁରିବ 75 ବର୍ଷ । 1947 ମସିହା ଅଗଷ୍ଟ 15 ତାରିଖ ଦିନ ବ୍ରିଟିଶ ଶାସନର ପିଞ୍ଜରାରୁ ସ୍ବାଧୀନ ହୋଇଥିଲା ପରାଧୀନ ଭାରତ । ଦେଶକୁ ମୁକ୍ତ କରିବାକୁ ଯାଇ ବଳିଦାନ ଦେଇଥିଲେ ଅନେକ ସ୍ବାଧୀନତା ସଂଗ୍ରାମୀ । ତେଣୁ ପ୍ରତିବର୍ଷ ଏହି ଦିନ ରାଷ୍ଟ୍ରବାସୀ ସେହି ବୀର ତଥା ମହାନପୁରୁଷଙ୍କୁ ମନେ ପକାଇବା ସହ ପାଳନ କରିଥାନ୍ତି ସ୍ବାଧୀନତା ଦିବସ ।
ସ୍ବତନ୍ତ୍ରତା, ବିବିଧତା ମଧ୍ୟରେ ସୁନ୍ଦରତା, ମତଭେଦ ମଧ୍ୟରେ ଏକତା ଏବଂ ବିଶ୍ବର ସବୁଠୁ ବଡ ଲୋକତନ୍ତ୍ରର ଭାଇଚାର ସହ ତ୍ରିରଙ୍ଗା ଉଡାଇ ଉତ୍ସବ ପାଳିବାର ଏହା ଏକ ଦିନ । ତେବେ ପ୍ରତିବର୍ଷ ସ୍ବାଧୀନତା ଦିବସକୁ ଏକ ନିର୍ଦ୍ଧିଷ୍ଟ ଉଦ୍ଦେଶ୍ୟ ବା ଥିମ ନେଇ ପାଳନ କରାଯାଏ । ଯେଉଁ କ୍ରମରେ ଚଳିତ ବର୍ଷର ଥିମ୍ ରହିଛି Nation first, always first ଅର୍ଥାତ୍ ରାଷ୍ଟ୍ର ସର୍ବପ୍ରଥମ । ପେଣ୍ଟିଂଠୁ ଆରମ୍ଭ କରି ଫୁଲ ସଜ୍ଜା ଏବଂ ହାସଟ୍ୟାଗଠୁର ଆରମ୍ଭ କରି ସୋସିଆଲ ମିଡିଆ ଯାଏଁ ସ୍ବାଧୀନତା ଦିବସ କାର୍ଯ୍ୟକ୍ରମର ପ୍ରତିଟି ଦିଗ Nation first, always first ଥିମ୍ ବହନ କରିବ ।
ଅଗଷ୍ଟ 15 ତାରିଖରେ ସ୍ବାଧୀନତା ଦିବସ ପାଳନ ପୂର୍ବକ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦିଲ୍ଲୀ ସ୍ଥିତ ଲାଲକିଲ୍ଲା ଠାରେ ରାଷ୍ଟ୍ରକୁ ସମ୍ବୋଧନ କରିବେ । ଏଥର ଟୋକିଓ ଅଲମ୍ପିକ୍ସି 2020ର ସମସ୍ତ ମେଡାଲ ବିଜେତା ଏଥିପାଇଁ ସ୍ବତନ୍ତ୍ର ଭାବେ ନିମନ୍ତ୍ରିତ ହୋଇଛନ୍ତି । ମହାମାରୀ ଯୋଗୁଁ ପୂର୍ବ ବର୍ଷ ଭଳି ଚଳିତ ବର୍ଷ ମଧ୍ୟ ସ୍ବାଧୀନତା ଦିବସ ଆୟୋଜନରେ ସର୍ବସାଧାରଣ ପ୍ରବେଶ ନିଷେଦ୍ଧ କରାଯାଇଛି । ଏଥିସହ ସମସ୍ତ ସାଂସ୍କୃତିକ ପରମ୍ପରାକୁ ବାତିଲ କରାଯାଇଛି । ସେହିପରି ପ୍ରତିବର୍ଷ ଭଳି ଏଥର ମଧ୍ୟ ନିର୍ଦ୍ଧିଷ୍ଟ ଥିମ ସହ ସ୍ବାଧୀନତା ଦିବସ ପାଳନ ହେବ । ତେବେ ଜାଣନ୍ତୁ କ'ଣ ଥିଲା ବିଗତ ସ୍ବାଧୀନତା ଦିବସ ପାଳନର ଥିମ୍...
2020 ସ୍ବାଧୀନତା ଦିବସ ଥିମ: 'ଆତ୍ମନିର୍ଭର ଭାରତ'
ଗତବର୍ଷ 74 ତମ ସ୍ବାଧୀନତା ଦିବସ ପାଳିଥିଲା ଦେଶ । ଯାହାର ଥିମ୍ ଥିଲା ଆତ୍ମନିର୍ଭର ଭାରତ । ସମଗ୍ର ବିଶ୍ବ କୋରୋନା ସହ ଲଢୁ ଥିବାବେଳେ ପିଏମ ମୋଦି ଆତ୍ମନିର୍ଭର ଭାରତର ନାରା ଦେଇଥିଲେ । ଏହି ଦିବସ ପାଳନ ଅବସରରେ ବିଭିନ୍ନ ସମାରୋହ ଏବଂ ସୋସିଆଲ ମିଡିଆ ଜରିଆରେ ଜନତାଙ୍କ ମଧ୍ୟରେ 'ଆତ୍ମନିର୍ଭର ଭାରତ'ର ଥିମ୍ ପ୍ରଚାର ପ୍ରସାର କରାଯାଇଥିଲା ।
2019 ସ୍ବାଧୀନତା ଦିବସ ଥିମ: 'Support our troops, salute our troops'
73ତମ ସ୍ବାଧୀନତା ଦିବସରେ ଥିମ୍ ଥିଲା Support our troops, salute our troops । ଅର୍ଥାତ୍ ଆମ ଯବାନଙ୍କୁ ସମର୍ଥନ କର, ସାଲ୍ୟୁଟ କର । ଏହି ଅବସରରେ ଆଉଟରିଚ୍ ଏବଂ କମ୍ୟୁନିକେସନ ବ୍ୟୁରୋ ଅଧିନରେ ଭାରତ ସରକାର 73ତମ ସ୍ବତନ୍ତ୍ରତା ଦିବସ ଉପରେ ପୋଷ୍ଟର ଡିଜାଇନ ପ୍ରତିଯୋଗିତା ଆୟୋଜନ କରିଥିଲେ । ଏହି ପ୍ରତିଯୋଗିତା ଭାରତର ପରିବର୍ତ୍ତିତ ଚେହେରା ଉପରେ ଆଧାରିତ ଥିଲା ।
2018 ସ୍ବାଧୀନତା ଦିବସ ଥିମ: 'one country, one people'