ଲକ୍ଷ୍ନୌ:ରାମ ମନ୍ଦିର ଗର୍ଭଗୃହର ମୁଖ୍ଯଦ୍ବାରରେ ଲାଗିଲା ସୁବର୍ଣ୍ଣ କବାଟ । ସମ୍ପୂର୍ଣ୍ଣ ସୁନାରେ ନିର୍ମିତ ଏହି କବାଟକୁ ଆଜି ମନ୍ଦିର ଗର୍ଭଗୃହର ମୁଖ୍ୟଦ୍ବାରରେ ସ୍ଥାପନ କରାଇଛି । ମନ୍ଦିରର ଗ୍ରାଉଣ୍ଡ ଫ୍ଲୋରରେ ମୋଟ 14ଟି ଦ୍ବାରରେ ସୁନା କବାଟ ଲଗାଯିବାର ବ୍ୟବସ୍ଥା ହୋଇଛି । ଆଜି ପ୍ରଥମ ସ୍ବର୍ଣ୍ଣ କବାଟ ସ୍ଥାପନ କରାଯାଇଛି । ଅନ୍ୟ କବାଟଗୁଡିକର ନିର୍ମାଣ କାର୍ଯ୍ୟ ଜାରି ରହିଛି । ଏହାକୁ ପ୍ରତିଷ୍ଠା ଉତ୍ସବ ପୂର୍ବରୁ ପର୍ଯ୍ୟାୟକ୍ରମେ ଲଗାଯିବ । ମହାରାଷ୍ଟ୍ରର ପ୍ରସିଦ୍ଧ ଶାଗୁଆନ କାଠରେ ଏହି କବାଟ ନିର୍ମାଣ କରାଯିବା ପରେ ଏଥିରେ ସୁନା ପରସ୍ତ ବା ଆସ୍ତରଣ ଚଢାଯାଉଛି । ଆଜି ମୁଖ୍ୟଦ୍ବାରରେ ଲାଗିଥିବା ସୁନା କବାଟରେ ଦୁଇଟି ହସ୍ତୀ ଓ ଦୁଇଟି ସକ୍ଷୀ ରହିଛନ୍ତି । ଏହା ସହ ଅନ୍ୟ ପାର୍ଶ୍ବ କାରୁକାର୍ଯ୍ୟ ମଧ୍ୟ ଦେଖିବାକୁ ମିଳିଛି ।
22 ତାରିଖରେ ମନ୍ଦିର ପ୍ରତିଷ୍ଠା ପୂର୍ବରୁ ଏହାର ଗ୍ରାଉଣ୍ଡ ଫ୍ଲୋରର ସମସ୍ତ କାର୍ଯ୍ୟ ପ୍ରାୟତଃ ଶେଷ ପର୍ଯ୍ୟାୟରେ ପହଞ୍ଚିଛି । ମନ୍ଦିରର ମୁଖ୍ୟଦ୍ବାର ବା ସିଂହଦ୍ବାରରେ ପଥର ନିର୍ମିତ ଦୁଇଟି ବିଶାଳ ସିଂହ ଓ ଦୁଇଟି ହସ୍ତୀ ମୂର୍ତ୍ତି ସ୍ଥାନ ପାଇଛନ୍ତି । ପୂର୍ବ ଦିଗରେ ଏହି ମୁଖ୍ୟଦ୍ବାରରେ ମୋଟ 32ଟି ପାହାଚ ରହିଛି । ତେବେ ମିଳିଥିବା ସୂଚନା ଅନୁସାରେ, ଏହି ସିଂହଦ୍ବାରରୁ ହିଁ ପ୍ରତିଷ୍ଠା ଉତ୍ସବ ଦିନ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଉପସ୍ଥିତ ଶ୍ରଦ୍ଧାଳୁଙ୍କୁ ସମ୍ବୋଧିତ କରିବେ ।