ଚେନ୍ନାଇ: ତାମିଲନାଡ଼ୁ ୧୦୦ ବର୍ଷ ପୁରୁଣା ପୋଲାଚୀ ପୌରପାଳିକାରେ ଏକ ଇତିହାସ ସୃଷ୍ଟି ହୋଇଛି । ଏହି ପୌରପାଳିକାରେ ପ୍ରଥମ ଥର ପାଇଁ ଜଣେ ମହିଳା ସଫେଇ ଗାଡ଼ିର ଡ୍ରାଇଭର ଭାବରେ ନିଯୁକ୍ତି ପାଇଛନ୍ତି । ଏହି ମହିଳା ଜଣକ ସ୍ଥାନୀୟ ରାଜା ମିଲ୍ ରୋଡ ଅଞ୍ଚଳର ଶାନ୍ତି ବୋଲି ଜଣା ପଡ଼ିଛି । ରାଜା ମିଲ୍ ରୋଡ ଅଞ୍ଚଳର ସ୍ବର୍ଗୀୟ ନାଗରାଜଙ୍କ ପତ୍ନୀ ହେଉଛନ୍ତି ଶାନ୍ତି । ସ୍ବାମୀଙ୍କ ଦେହାନ୍ତ ପରେ ସେ ତାଙ୍କ ୪ଟି ସନ୍ତାନକୁ ଘର ଚଳାଉଥିଲେ । ମୂଲ ମଜୁରୀ କରି ଯାହା ବି ଆଣୁଥିଲେ ତାହା ପରିବାର ପାଇଁ ନିଅଣ୍ଟିଆ ହେଉଥିଲା । ସେପଟେ ତାଙ୍କ ପାଇଁ କୌଣସି ସାହାରା ମଧ୍ୟ ନଥିଲା ।
ଅଭାବ ଅନଟନ ମଧ୍ୟରେ ଶାନ୍ତି ଗାଡ଼ି ଚଳାଇବା ପାଇଁ ଆଗ୍ରହ ପ୍ରକାଶ କରିଥିଲେ । ସେ ଗାଡ଼ି ଚଳାଇବା ସହ ଏଥିପାଇଁ ଲାଇସେନ୍ସ ମଧ୍ୟ ପ୍ରାପ୍ତ କରିଥିଲେ । କୌଣସିମତେ ଶାନ୍ତିଙ୍କ ବିଷୟରେ ପୋଲାଚୀ ପୌରପାଳ ଅଧ୍ୟକ୍ଷା ଶ୍ୟାମଳା ନବନୀତକ୍ରୀଷ୍ଣନ ଜାଣିବାକୁ ପାଇଲେ । ସେ ଶାନ୍ତିଙ୍କୁ ପୋଲଚୀ ପୌରପାଳିକାର ସଫେଇ ଗାଡ଼ି ଚାଳକ ଦାୟିତ୍ବ ଦେଇଛନ୍ତି । ଏଭଳି ଭାବରେ ୧୦୦ ବର୍ଷ ପୁରୁଣା ପୋଲାଚୀ ପୌରପାଳକୁ ପ୍ରଥମ ମହିଳା ସଫେଇ ଗାଡ଼ି ଚାଳକ ମିଳିଛି ।