ହାଇଦ୍ରାବାଦ:ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବହୁଚର୍ଚ୍ଚିତ ରେଡିଓ ସମ୍ବାଦ କାର୍ଯ୍ୟକ୍ରମ ‘ମନ୍ କି ବାତ୍’ର 114ତମ ସଂସ୍କରଣରେ ସ୍ଥାନ ପାଇଛି ଜଣେ ଓଡିଆ ଯୁବକଙ୍କ କଥା । କାର୍ଯ୍ୟକ୍ରମରେ ମୟୂରଭଞ୍ଜର ଯୁବକ ରାମଜିତ୍ ଟୁଡୁଙ୍କୁ ପ୍ରଶଂସା କରିଛନ୍ତି ମୋଦି । ନିଜ ମାତୃଭାଷା ପ୍ରତି ତାଙ୍କ ଉଦ୍ୟମ ବେଶ ପ୍ରଶଂସନୀୟ ବୋଲି ପ୍ରଧାନମନ୍ତ୍ରୀ କହିଛନ୍ତି । ସାନ୍ତାଳୀ ଭାଷାକୁ ରାମଜିତ ଡିଜିଟାଲାଇଜେସନ୍ କରି ପାରିଛନ୍ତି । ଯାହା ଦ୍ବାରା ଏହି ଭାଷା ଏବେ ସହଜରେ ଲୋକଙ୍କ ପାଖରେ ପହଞ୍ଚି ପାରିଛି । ଟୁଡୁଙ୍କ ଦ୍ବାରା ବିକଶିତ ଏକ ଡିଜିଟାଲ୍ ପ୍ଲାଟଫର୍ମ ଦ୍ବାରା ସାନ୍ତାଳି ଭାଷାକୁ ପଢାଯିବା ସହ ଓ ଏବେ ଡିଜିଟାଲ ଭାବେ ଲେଖା ଯାଇପାରୁଛି ବୋଲି ପ୍ରଧାନମନ୍ତ୍ରୀ ମୋଦି କହିଛନ୍ତି ।
- ସାନ୍ତାଳୀ ଭାଷା ଡିଜିଟାଲ ପରିଚୟ ଦେଇଛନ୍ତି ରାମଜିତ:
ପ୍ରଧାନମନ୍ତ୍ରୀ କହିଛନ୍ତି,‘‘ଆମର ଏକ ଭାଷା ଅଛି ‘ସାନ୍ତାଳୀ ଭାଷା’ । ଏହାକୁ ଡିଜିଟାଲ ଇନୋଭେସନ ମାଧ୍ୟମରେ ନୂଆ ପରିଚୟ ଦେବା ପାଇଁ ଅଭିଯାନ ଆରମ୍ଭ ହୋଇଛି । ଆମ ଦେଶର ଅନେକ ରାଜ୍ୟରେ ରହୁଥିବା ସାନ୍ତାଳି ଜନଜାତି ଲୋକେ ସାନ୍ତାଳି ଭାଷାରେ କଥା ହୁଅନ୍ତି । ଭାରତ ବ୍ୟତୀତ ବାଂଲାଦେଶ, ନେପାଳ ଓ ଭୁଟାନରେ ମଧ୍ୟ ସାନ୍ତାଳି ଭାଷା ବ୍ୟବହାର କରୁଥିବା ଲୋକେ ବସବାସ କରୁଛନ୍ତି । ଏହି ଭାଷାକୁ ଅନ-ଲାଇନ ମାଧ୍ୟମରେ ପରିଚୟ ଦେବା ପାଇଁ ଓଡ଼ିଶାର ମୟୂରଭଞ୍ଜର ଯୁବକ ରାମଜିତ ଟୁଡୁ ଏକ ଅଭିଯାନ ଚଳାଇଛନ୍ତି । ସେ ଏପରି ଏକ ଡିଜିଟାଲ ପ୍ଲାଟଫର୍ମ ପ୍ରସ୍ତୁତ କରିଛନ୍ତି, ଯାହା ଦ୍ବାରା ସାନ୍ତାଳି ଭାଷା ସହ ଜଡିତ ସାହିତ୍ୟକୁ ପଢା ଓ ଲେଖା ମଧ୍ୟ ଯାଇପାରିବ । ''