ଅନୁଗୋଳ: ନିର୍ବାଚନ ଯେତିକି ପାଖେଇ ଆସୁଛି ରାଜନୀତି ପାଣିପାଗ ସେତିକି ସରଗରମ ହେଉଛି । ଏହାରି ଭିତରେ ଅନୁଗୋଳ ଜିଲ୍ଲା ଆଠମଲ୍ଲିକ ନିର୍ବାଚନ ମଣ୍ଡଳୀରେ ରାଜନୀତିରେ ହଟଚମଟ ଦେଖିବାକୁ ମିଳିଲାଣି । ନିର୍ବାଚନ ପୂର୍ବରୁ ଚାଲିଛି ଦଳ ଡିଆଁ । ବିଜେଡିର ପାୱାର ସୋ'ର ଦିନକ ପରେ ବିଜେଡି ଛାଡି ବିଜେପିରେ ଯୋଗ ଦେଇଛନ୍ତି ଆଠମଲ୍ଲିକ ଏନଏସିର ପୂର୍ବତନ ଅଧ୍ୟକ୍ଷ ସନ୍ତୋଷ ହୋତା । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଉପସ୍ଥିତରେ ବିଜେପିରେ ସାମିଲ ହୋଇଛନ୍ତି ସନ୍ତୋଷ ।
କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଅନୁଗୋଳ ଜିଲ୍ଲା ଗସ୍ତର ଦ୍ବିତୀୟ ଦିନରେ ଅନୁଗୋଳ ଜିଲ୍ଲା ବିଜେପି କାର୍ଯ୍ୟାଳୟରେ ଏକ ମିଶ୍ରଣ ପର୍ବ ଆୟୋଜିତ ହୋଇଥିଲା । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଉପସ୍ଥିତିରେ ଏହି ମିଶ୍ରଣ ପର୍ବରେ ଜିଲ୍ଲାର ଆଠମଲ୍ଲିକ ନିର୍ବାଚନ ମଣ୍ଡଳୀରୁ ପ୍ରାକ୍ତନ ଏନଏସି ଚେୟାରମ୍ୟାନ ସନ୍ତୋଷ ହୋତାଙ୍କ ନେତୃତ୍ୱରେ ଶତାଧିକ ବିଜେଡି ଓ କଂଗ୍ରେସ କର୍ମୀ ଆଜି ବିଜେପିରେ ଯୋଗ ହୋଇଛନ୍ତି । ସନ୍ତୋଷ ହୋତାଙ୍କ ସହ ପ୍ରାକ୍ତନ କାଉନସିଲର ଭାବଗ୍ରାହୀ ସେଠୀ ଓ ବିନୟ ପାତ୍ର, ମାୟାଧର ମିଶ୍ର, ପ୍ରଦୀପ କୁମାର ନନ୍ଦ, ରବିନାରାୟଣ ଦାସ, ରାଧାମୋହନ ତ୍ରିପାଠୀ, ସିପୁ ସିଂହ, ମନୋରଞ୍ଜନ ପ୍ରଧାନ, ରାକେଶ କୁମାର ସିଂହ, ଚିତ୍ତରଞ୍ଜନ ସିଂହ, ନମଶିବାୟ ବେହେରା, ମୋନଜ ନାୟକ, ସୁଭେନ୍ଦ୍ର ପ୍ରଧାନ, ଜଗନ୍ନାଥ ବେହେରା, ବିଶ୍ୱଜିତ୍ ସାହୁ, ତୋଫାନ ବେହେରା, ରଞ୍ଜୁ ନାଏକଙ୍କ ସମେତ ଶତାଧିକ କଂଗ୍ରେସ କର୍ମୀ ମଧ୍ୟ ବିଜେପିରେ ଯୋଗ ଦେଇଛନ୍ତି ।