RSS Training Classes Change : आरएसएसमध्ये गणवेशानंतर आणखी 'हे' मोठे बदल होण्याची शक्यता, पाहा व्हिडिओ - भुज

नागपूर RSS Training Classes Change :राष्ट्रीय स्वयंसेवक संघात गणवेशानंतर आता आणखी एक मोठा बदल होण्याचा मार्गावर आहे. स्वयंसेवक व प्रचारक घडविणाऱ्या प्रशिक्षण वर्गांच्या प्रणालीत पूर्णतः बदल करण्यात येणार असून अभ्यासक्रम देखील बदलण्यात येणार आहे. आरएसएसच्या अखिल भारतीय कार्यकारणी मंडळाची बैठक रविवारपासून गुजरात मधील भुज इथं सुरू होणार आहे त्यात याच्या आराखड्यावर शिक्कामोर्तब केलं जाण्याची शक्यता आहे. 

 
अनेक बदल होण्याची शक्यता : आरएसएसमध्ये प्राथमिक, प्रथम, द्वितीय आणि तृतीय असे वर्ग दरवर्षी आयोजित करण्यात येतात. साधारणतः उन्हाळ्याच्या सुट्ट्यांच्या काळात हे वर्ग आयोजित केले जातात. या वर्गांच्या प्रणालीत या अगोदरही मोठे बदल झाले आहेत. मात्र, आता तंत्रज्ञानाचं युग आहे. त्यामुळं संघातील विविध विभागांमध्ये प्रशिक्षणामध्ये त्यादृष्टीनं नवीन मुद्दे व विषयांचा समावेश करण्यात येणार आहे. यासोबतच या वर्गांचा कालावधी कमी करण्याबाबत विचार सुरू आहे. सुरुवातीच्या काळात शारीरिक उपक्रमावर जास्त भर असायचा, त्यानंतर आपत्ती व्यवस्थापन, सामाजिक जीवन, ग्रामविकास, कृषी, प्रसार माध्यमे या विषयांबाबतही प्रशिक्षण देण्यात येतं. यात आता आणखी काही बदल करण्यात येणार आहेत. मागील काही काळापासून अभ्यासक्रमात बदल करण्याबाबत चर्चा होती त्यावर अखिल भारतीय कार्यकारणी मंडळाच्या बैठकीत मंथन करण्यात येईल असं आरएसएसचे अखिल भारतीय प्रचार प्रमुख सुनील आंबेकर यांनी सांगितलंय.