पंजाबमध्ये मिळालेल्या यशानंतर पुण्यात आम आदमी पक्षाच्यावतीने जल्लोष - आप जल्लोष पुणे

पुणे - देशभर सध्या उत्तर प्रदेश, पंजाब, गोवा, उत्तराखंड आणि मणिपूर या पाच राज्यांमध्ये सुरू असलेल्या विधानसभा निवडणुकांची चर्चा आहे. आज या पाचही राज्यांमधल्या निवडणुकांचे निकाल लागत आहे. पाच राज्यांपैकी 4 राज्यांमध्ये भाजप आघाडीवर आहे. तर, पंजाबमध्ये आम आदमी पक्ष हे तब्बल 90 जागांवर आघाडीवर असून आत्ता दिल्लीनंतर पंजाबमध्ये देखील आम आदमी पक्षाचा मुख्यमंत्री असणार आहे. पंजाबमध्ये आम आदमी पक्षाला मिळालेल्या यशानंतर पुण्यात आम आदमी पक्षाच्या कार्यालयाबाहेर जल्लोष साजरा करण्यात आला. साखर वाटप करत आम आदमी पक्षाच्या कार्यकर्त्यांनी जल्लोष साजरा केला आहे. आता आम आदमी पक्ष हे राष्ट्रीय पक्ष होणार आहे. दोन राज्यात आम आदमी पक्षाचे मुख्यमंत्री हे असणार आहे. लवकरच राज्यातील स्थानिक निवडणुकांमध्येही आम आदमी पक्षाचा अशाच पद्धतीने निकाल लागेल, असा विश्वास यावेळी आम आदमी पक्षाचे राज्य प्रवक्ता अभिजीत मोरे यांनी व्यक्त केला.