यवतमाळ- यावर्षी परतीच्या पावसाने कपाशीचे आणि सोयाबीनचे पीक उदध्वस्त झाले. त्यामुळे, आर्थिक कोंडीत सापडलेल्या महागाव तालुक्यातील उटी येथील शेतकऱ्याने शेतातच पायाला जिवंत विद्युत तार गुंडाळून आत्महत्या केली. ही घटना काल दुपारच्या सुमारास उघडकीस आली. पंजाबराव माधवराव गावंडे (वय ६०) असे मृत शेतकऱ्याचे नाव आहे.
माहिती देताना स्वाभिमानी शेतकरी संघटनेचे जिल्हाध्यक्ष मनीष जाधव
गावंडे हे अल्पभूधारक शेतकरी असून त्यांच्याकडे केवळ एक हेक्टर शेती आहे. शेतातील तुटपुंज्या उत्पन्नामुळे ते सातत्याने गरिबीशी दोन हात करीत होते. तसेच, त्यांच्यावर सोसायटीचे कर्ज आणि खाजगी कर्ज होते. त्यात मागील तीन वर्षापासून त्यांच्या पत्नीला पॅरालिसिसचा आजार झाल्याने ते प्रचंड विवंचनेत होते. यंदा परतीच्या पावसाने शेतातील कपाशी नेस्तनाबूत केली होती. संकटांच्या मालिकेमुळे वैफल्यग्रस्त झालेले गावंडे यांनी जीवन संपवण्याचा निर्णय घेतला.