ग्रामपंचायत निवडणूक : राज्यातील 'या' गावात मतदार 89 अन् उमेदवार 12

यवतमाळ जिल्ह्यात वागदा सायखेडा या गावाची संख्या दिडशे असून केवळ 89 मतदार आहेत. या गावात ग्रामपंचायत निवडणुकीसाठी 12 उमेदवार उभे आहेत.

यवतमाळ - जिल्ह्यात एक अशी ग्रामपंचायत आहे की, त्या ठिकाणी केवळ 89 मतदार आहे. मात्र, निवडणुकीच्या रिंगणात तब्बल 12 उमेदवार उभे आहेत. 'वागदा सायखेडा', असे त्या ग्रामपंचायतीचे नाव आहे. या गावातील मतदार पहिल्यांदाच आपल्या बोटावर मतदानाची शाही लावणार असून बिनविरोधची 45 वर्षाची परंपरा मोडीत काढणार आहेत.

केवळ पाच जागांसाठी होणार निवडणूक

वागदा सायखेडा ही सात सदस्यांची ही ग्रामपंचायत आहे. या गावाची लोकसंख्या केवळ दीडशे असून मतदारांची संख्या केवळ 89 इतकी आहे. सात सदस्यांमध्ये एक सदस्य बिनविरोध निवडून आलेला आहे. तर एका ओबीसी आरक्षणवर कुठल्या नागरिकाचा उमेदवारी अर्ज न आल्याने ही जागा रिक्त आहे. त्यामुळे केवळ पाच जागांसाठी निवडणूक होणार आहे.

गावात तीनच वार्ड

वागदा सायखेडा या गावात केवळ तीन वार्ड असून वार्ड क्रमांक एकमध्ये 34 मतदार, वार्ड क्रमांक दोनमध्ये 29 मतदार तर वार्ड क्रमांक तीनमध्ये 26 मतदार आहेत. गावात दोन गट पडल्याने गावातील तरुणांनी निवडणूकीत सहभाग घेत प्रथमच या गावी निवडणुकीची प्रक्रिया पार पडली जाणार आहे.

निवडून येण्यासाठी केवळ दहा मतांची गरज

89 मतदार आणि रिंगणात 12 उमेदवार यातही पाच उमेदवारांना निवडून द्यायचे आहे. त्यामुळे कुठल्याही उमेदवाराला दहापेक्षा जास्त मते मिळाल्यास पडल्यास तो निवडूण येणार आहे. गावामध्ये परंपरेने चावडीवर बसून सरपंच, सदस्यांची निवड व्हायची. मात्र, यावर्षी प्रत्यक्ष युवकांनी निवडणुकीच्या रिंगणात उडी मारली आहे.

45 वर्षांनंतर गावात निवडणूक

तब्बल 45 वर्षानंतर या गावात ग्रामपंचायतीसाठी निवडणूक होणार आहे. यापूर्वी या गावात ग्रामपंचायत सदस्य व सरपंच हे चावडीवर चर्चा करुन बिनविरोध निवडले जात होते. मात्र, 45 वर्षांनंतर यंदा निवडणूक होणार असल्याने पहिल्यांदाच मतदार ग्रामपंचायत निवडणुकीसाठी बोटावर शाई लावून घेणार आहेत.

हेही वाचा -ग्रामपंचायत निवडणुकीत पंधरा हजार उमेदवार रिंगणात; एक हजार 346 सदस्य बिनविरोध

हेही वाचा -दिग्रस-मानोरा रस्त्यावरील जीवन प्राधिकरणाची जलवाहिनी फुटली; पाण्याचा अपव्यय