यवतमाळ - उसने दिलेले पैसे परत मागत असल्याने मित्राला रूमवर बोलावून त्याचा गळा आवळून खून केल्याची धक्कादायक घटना वणी शहरात उघडकीस आली. सतीश देवासे (वय 28, रा. तुकूम, जि.चंद्रपूर) असे मृताचे तर, करण कश्यप (वय 25, रा. आर्वी) असे मारेकर्‍याचे नाव आहे. आरोपीला पोलिसांनी नागपुरातून अटक केली आहे.
करण हा वणी येथील एका खासगी फायनन्स कंपनीत कामाला होता. जुगाराचा छंद जडल्याने त्याच्या डोक्यावर कर्जाचे ओझे वाढले होते. त्याने त्याच्याच कंपनीत काम करणार्‍या सतीश देवासेकडून उसनवारीने साठ हजार रुपये घेतले होते. सतीशने काही दिवसांपासून दिलेल्या पैशांसाठी तगादा लावला होता. करण पैसे देण्यासाठी टाळाटाळ करत असल्याने सतीश त्याच्या रवीनगर येथील खोलीवर गेलाला. पैशाच्या कारणावरून दोघांमध्ये वाद झाला. हा वाद विकोपाला जाऊन दोरीच्या साहाय्याने आरेपीने सतीशचा गळा आवळून खून केला. मृतदेह पोत्यात भरून त्याची विल्हेवाट लावण्याची योजना करणने आखली. मात्र, त्याला संधी मिळाली नाही. दोन दिवस मृतदेह खोलीतच राहिल्याने दुर्गंधी पसरण्यास सुरुवात झाली असता खोलीला कुलूप लावून करणने पोबारा केला. घरातून दुर्गंधी येत असल्याने घरमालक अनिल आसुटकर यांना संशय आला. त्यांनी तत्काळ वणी पोलिस ठाणे गाठून ठाणेदार वैभव जाधव यांना माहिती दिली. पोलिसांनी कुलूप तोडून आत प्रवेश केला असता, मृतदेह आढळून आला.