यवतमाळ - मारेगाव तालुक्यातील पाथरी येथील अनिल पेचे यांच्या शेतातल्या विहिरीत मागील ६ महिन्यापासून गव्हाळ्या जातीचे ३ कोब्रा नाग पडले आहेत. या सापांना आज २ सर्पमित्रांनी पकडून मारेगाव वनविभागामार्फत त्यांना सालेभटी येथील फेस्कीच्या जंगलात सोडून जीवदान दिले आहे. हरिष कापसे व योगेश केझळकर (वणी) असे या सर्पमित्रांचे नाव आहे.
यवतमाळमध्ये ३ कोब्रा सापांना सर्पमित्राकडून जीवदान
पाथरी येथील अनिल पेचे या शेतकऱ्याच्या शेतातील विहीरीमध्ये गेल्या ६ महिण्यापूर्वी ऐन होळीच्या दिवशी गव्हाळ्या जातीचे विषारी ३ कोब्रा नाग पडले होते. तेव्हापासून अनेकदा त्यांना विहिरीबाहेर काढण्याचा प्रयत्न पेचे या शेतकऱ्याने केला. मात्र, ते अपयशी ठरले. दरम्यान, सर्पमित्र योगेश केझळकर व हरिष कापसे यांच्याशी मोबाईलवरून संपर्क साधत त्यांना विहिरीतील नाग काढण्यासाठी पाचारण करण्यात आले.