यवतमाळ - मागील दोन दिवसापासून सुरू असलेल्या मुसळधार पावसाचा नेर तालुक्याला मोठ्या प्रमाणात फटका बसला आहे. तालुक्यातील मंगलादेवी, गौळण, माणिकवाड, पिंपरी मुक्तापूर, अजंती शिरजगाव, वटफळी, मालखेड या गावातील दोनशे एकर क्षेत्रावरील पिके पाण्याखाली गेली आहेत.
नेर तालुक्यातील 200 एकर शेती पाण्याखाली
काल रात्री नेर तालुक्यात 56 मिलीमीटर पावसाची नोंद झाली. या पावसामुळे तालुक्यातील मंगलादेवी लगत असलेल्या मिलमिली नदीला पूर आला. नदीलगत असलेल्या दोनशे एकर शेतीमध्ये पुराचे पाणी शिरले. त्यामुळे शेतकऱ्यांची पिके वाहून गेली. पुराचा प्रवाह एवढा प्रचंड होता की, गेल्या 50 वर्षात अशा प्रकारच्या पूर बघितला नाही, असे अनेक वयोवृद्ध शेतकऱ्यांनी सांगितले.