सेवानिवृत्त शिक्षकाची निसर्गावर मात, वाशिम जिल्ह्यात बहरली केसर आंब्याची बाग

जिल्हा परिषद मराठी शाळेत शिक्षक म्हणून सेवानिवृत्त झाल्यानंतर मोहम्मद उमदराज मालवी यांनी शहरालगत असलेल्या आपल्या शेतात विविध फळबागांचा प्रयोग करत त्यामध्ये आंतरपिके घेण्यास सुरुवात केली. त्यांनी आपल्या शेतात केशर आंब्याची बाग फुलवली आहे. त्याचा त्यांना फायदाही होत आहे.

वाशिम- निसर्गाचा समतोल बिघडल्यामुळे पारंपरिक शेती अडचणीत आली आहे. मात्र, मालेगाव येथील सेवानिवृत्त शिक्षक मोहम्मद उमदराज मालवी या प्रयोगशील शेतकऱ्याने नैसर्गिक आपत्तीतून मार्ग शोधला. शेतात पिकेल ते पिकविण्यापेक्षा बाजारात विकेल तेच पिकविण्याचा त्यांनी निर्णय घेतला. यासाठी त्यांनी पारंपरिक शेतीला फाटा देत आधुनिक शेतीची कास धरून केसर आंब्याची बाग फुलविली आहे. यंदाच्या अनुकूल वातावरणामुळे आंब्याची बाग मोहरल्याने अपेक्षित उत्पादनाची अपेक्षा उंचावली आहे.

मागील सहा वर्षांपासून निसर्गाचा समतोल बिघडल्यामुळे शेतीपासून शाश्वत उत्पन्नाची हमी उरली नाही. परिणामी, दुष्काळात होरपळत असलेल्या या जिल्ह्यात शेतकरी आत्महत्यांच्या घटनांमध्ये वाढ होत असल्याचे चित्र आहे. मात्र, येथील शेतकरी उमदराज मालवी या 76 वर्षीय सेवानिवृत्त शिक्षकाने निसर्गावर मात करत जिद्द व चिकाटीच्या जोरावर केसर आंब्याची बाग फुलविली आहे.

जिल्हा परिषद मराठी शाळेत शिक्षक म्हणून सेवानिवृत्त झाल्यानंतर मालवी यांनी शहरालगत असलेल्या आपल्या शेतात विविध फळबागांचा प्रयोग करत त्यामध्ये आंतरपिके घेण्यास सुरुवात केली. दरम्यान, आपल्याकडेसुद्धा आंब्याची बाग असावी, असा त्यांचा मानस होता. त्यामुळे आंब्याच्या विविध प्रजातींची संपूर्ण माहिती घेऊन आपल्या शेतात जवळपास तीनशे केसर आंब्याच्या कलमी रोपे लावली होती. त्यांचा हा प्रयोग यशस्वी झाला असून मागील अनेक वर्षांपासून ते केसर आंबे विक्री करून लाखो रुपयांची उलाढाल करत आहेत.

हेही वाचा -कामगार नोंदणीसाठी शेकडो महिला रात्रभर रांगेत, कामगार अधिकाऱ्यांचा नियोजन शून्य कारभार