प्रगतशील शेतकऱ्यावर डाळिंब बाग नष्ट करण्याची वेळ

आपल्या २ एकर शेतात लावलेल्या डाळिंबाच्या बागेतील उत्पन्नाचा खर्च निघत नसल्याने तसेच अवकाळी पावसाने झालेल्या नुकसानीमुळे हताश झालेल्या शेतकऱ्याने बागेतील संपूर्ण झाडेच जेसीबीने उपटून टाकली.

वाशिम - येथील शेतकरी नंदकिशोर उल्हामाले यांनी त्यांच्या २ एकर शेतात लावलेल्या डाळिंबाच्या बागेतील संपूर्ण झाडे जेसीबी मशिनने उपटून फेकून दिली. अतिवृष्टीमुळे डाळिंबाच्या बागेचे झालेले नुकसान पाहता त्यांनी संपूर्ण बागेतील झाडे उपटून टाकण्याचा निर्णय घेतला.

शेतीत नवनवीन प्रयोग यशस्वी करणारे तसेच राज्य शासनाचा कृषी पुरस्कार प्राप्त शेतकरी नंदकिशोर उल्हामाले यांनी आपल्या २ एकर शेतात डाळिंब बाग तयार करून नवीन प्रयोग करण्याचा प्रयत्न केला होता. मात्र, विदर्भात डाळिंब बागेसाठी पोषक वातावरण नसून, उत्पादन खर्चही निघत नसल्याचे त्यांच्या लक्षात आले. तसेच नुकत्याच झालेल्या अवकाळी पावसामुळे झालेले बागेचे नुकसान पाहता त्यांनी संपूर्ण बागेतील झाडे जेसीबी मशीनने उपटून टाकली.

हेही वाचा - पोलीस ठाण्यातील मुद्देमाल मूळ मालकास परत

त्यांनी २०१४ मध्ये आपल्या २ एकराच्या शेतीमध्ये डाळिंबाची बाग उभारली होती. यासाठी त्यांना ३ वर्षात एकूण ७ लाख ५० हजार रुपये इतका खर्च आला. या तुलनेत उत्पादन न झाल्याने तसेच बागेसाठी लावण्यात आलेला खर्चही निघाल्याने ते निराश झाले. त्यातच, अवकाळी पावसामुळे झाडे सुकल्याने अखेर त्यांनी जेसीबीद्वारे संपूर्ण बागच उपटून टाकली.

हेही वाचा - मंगरूळपीरमध्ये संजय गांधीसह श्रावण बाळ निराधार योजना बंद, वृद्धांचे आंदोलन