वाशिम- 'साहेब, कोरोना संकटात काम करताना आमच्याकडे किट नाहीत, मास्क नाहीत, सॅनिटायझरही नाही... उलट कामाचा ताण वाढला आहे... तुम्ही जर मुख्यमंत्री असता तर आमच्यावर ही वेळ आली नसती,' अशी भावना जऊळका पोलीस स्टेशनच्या एका पोलिसाने, माजी मुख्यमंत्री आणि सध्याचे विरोधी पक्षनेते देवेंद्र फडणवीस यांच्याकडे व्यक्त केली.
देवेंद्र फडणवीस रविवारी रात्री नागपूरहून मुंबईला निघाले होते. किन्हीराजा येथे हायवेवर पेट्रोलिंग करत असलेल्या पोलिसाने त्यांची गाडी अडवली आणि त्याने आपल्या भावना त्यांच्यापुढे व्यक्त केल्या. फडणवीस यांनीही त्या पोलिसाची परिस्थिती ऐकून घेतली.
फडणवीस यांना तो पोलीस म्हणाला, 'कोरोनापासून बचाव करण्यासाठी आवश्यक असलेली किट्स, मास्क किंवा सॅनिटायझर यासारख्या वस्तू मला उपलब्ध करून दिलेल्या नाहीत, याकडे तुम्ही लक्ष द्या. तुम्ही मुख्यमंत्री असता, तर ही वेळ आली नसती.'