वाशिम जिल्ह्यात कोरोना लसीकरणाचा ड्राय रन सुरू

राज्यात दुसऱ्या टप्प्यात कोरोना लस देण्याबाबत प्रात्यक्षिक केले जात आहे. प्रत्येक जिल्ह्यात निवडलेल्या ठिकाणी ड्राय रन पार पडत आहेत. प्रत्यक्ष लसीकरणावेळी काही अडचणी येऊ नयेत, म्हणून हे ड्राय रन घेतले जात आहेत.

वाशिम -कोरोना लसीकरणाची रंगीत तालीम म्हणून आज वाशिम जिल्ह्यातील 3 ठिकाणी ड्राय रन घेण्यात येत आहे. वाशिम सामान्य रुग्णालयात, कारंजा उपजिल्हा रुग्णालय आणि शेलुबाजार प्राथमिक आरोग्य केंद्र, अशा तीन ठिकाणी हा ड्राय रन पार पडत आहे. कोरोना लसीकरणाच्या ड्राय रनमध्ये 9 ते 12 या तीन तासात प्रत्येक सेंटरवर 25 आरोग्य कर्मचाऱ्यांना लस देण्यात येत आहे.

या ड्राय रनद्वारे कोरोना प्रतिबंधासाठी राबवण्यात येणाऱ्या लसीकरण मोहिमेची रंगीत तालीम होणार आहे. ऑनलाइन नोंदणीसाठी को-इन हे सॉफ्टवेअर वापरण्यात आले आहे. याद्वारे या सर्व कार्यप्रणालीची माहिती घेतली जाणार आहे. प्रत्यक्ष लसीकरण मोहीम राबवताना कोणतीही अडचण येणार नाही, अशी माहिती जिल्हा शल्य चिकित्सक डॉ. मधुकर राठोड यांनी दिली.

या अगोदर चार जिल्ह्यात झाले होते ड्राय रन -

भारतामध्ये कोरोना लसीची तयारी पूर्ण झाली आहे. लवकरच प्रत्यक्ष लसीकरणाला देखील सुरूवात केली जाणार आहे. मात्र, लसीकरणाच्या तारखेची घोषणा करण्याआधी सर्व तयारीची चाचपणी, केंद्र सरकारकडून केली जात आहे. याच पार्श्वभूमीवर देशभरातील सर्व राज्यांमध्ये 'ड्राय रन' घेतली जात आहे. २ जानेवारीला महाराष्ट्रामध्ये पुणे, नागपूर, जालना आणि नंदुरबार या ४ जिल्ह्यात 'ड्राय रन' घेण्यात आले होते. त्यानंतर आज (शुक्रवार) राज्यातील प्रत्येक जिल्ह्यात ड्राय रन घेतले जात आहे.