वाशिम- मुख्यमंत्री देवेंद्र फडणवीस यांनी सोमवारी बंजारा समाजाची काशी म्हणून ओळख असलेल्या पोहरादेवी येथे जाऊन संत रामराव महाराजांची भेट घेतली. दरम्यान, निवडणुकीच्या तोंडावर केंद्रीय गृहमंत्री अमित शाह यांनी कारंजा येथील सभेपूर्वी पोहरादेवीला गेल्यानंतरही रामराव महाराजांची भेट न घेतल्याने बंजारा समाजात नाराजी पसरली होती. ती नाराजी दुर करण्यासाठी स्वतः मुख्यमंत्र्यांनी महाराजांची भेट घेतली.
केंद्रीय गृहमंत्री अमित शाह हे कारंजा येथे महायुतीचे उमेदवार विद्यमान आमदार राजेंद्र पाटणी यांच्या प्रचार सभेसाठी आले होते. त्याच्या दुसऱ्याच दिवशी मुख्यमंत्री फडणवीस यांनी वाशिममध्ये महायुतीचे उमेदवार लखन मलिक यांच्यासाठी प्रचार सभा घेतली. दरम्यान, गृहमंत्री शाह हे पोहरादेवीत येऊनही वेळेअभावी रामराव महाराजांशी भेटले नाहीत. त्यामुळे बंजारा समाजात नाराजी व्यक्त होती.