भरधाव शिवशाहीला अपघात; चालकासह पाच जखमी

यवतमाळहून वर्ध्याला येणाऱ्या भरधाव शिवशाही बसचे नियंत्रण सुटल्याने अपघात घडला. यावेळी वाहनचालकासह चार प्रवासी जखमी झाले. जखमींमध्ये महिलेचा समावेश असून, त्यांची प्रकृती गंभीर असल्याची माहिती मिळत आहे.

वर्धा -सालोड हिरापूर परिसरात शिवशाही बसचा अपघात झाला. सुदैवाने या अपघातात कोणतीही जीवीतहानी झाली नाही. या अपघातात वाहनचालक आणि चार प्रवासी जखमी झाले असून, यात एका महिलेचा समावेश आहे.

यवतमाळवरून प्रवासी घेऊन वर्ध्याला येत असलेली शिवशाही (क्रमांक MH 29 BE 1259) ही बस सालोड हिरापुर स्मशान भूमी परिसरात भरधाव वेगात जात होती. यावेळी चालकाचे नियंत्रण सुटल्याने अपघात झाल्याचे बोलले जात आहे. अपघातांनातर बस पलटी होऊन रस्त्याच्या कडेला पडली.

यावेळी सावंगी पोलिसांनी तातडीने घटनास्थळी दाखल होत वाहतूक सुरळीत केली. अपघात झाल्यानंतर गावकऱ्यांनी जखमींना बाहेर काढले. तसेच, तात्काळ मिळेल त्या वाहनाने प्रवाशांना लगतच्या सावंगी रूग्णालयात हलवल्याने योग्य वेळी उपचार मिळाले. या घटनेची नोंद घेतली असून पुढील तपास करत असल्याची माहिती पोलीस उपनिरीक्षक मोहन धोंगडे यांनी दिली.

हेही वाचा : वर्ध्यात दिवाळी दिवशीच बहीण भावाचा बुडून मृत्यू; तलावात आढळले मृतदेह