वर्धा : पवनारच्या नदीकाठी आढळला अज्ञात व्यक्तीचा सांगाडा, शवविच्छेदनानंतर स्पष्ट होणार मृत्यूचे कारण

सांगाड्याजवळ ओळख पटनारे कोणतेही ओळखपत्र किंवा कपडे आढळुन आले नाही. सेवाग्राम पोलीस ठाण्याचे ठाणेदार संजय बोठे यांनी स्टाफसह पंचनामा केला. त्यानंतर ओळख  पटवविण्यासाठी  सांगाडा सेवाग्राम रुग्णालयात शवविच्छेदनाकरिता नेण्यात आला.

वर्धा- पवनार येथील धाम नदी लगतच्या बेशरम झाडाच्या परिसरात सांगाडा आढळून आला आहे. नदीपात्रालगत मानवी हाडाचा सांगाडा सापडल्याने चांगलीच खळबळ उडाली. ही घटना रविवारी सकाळी उघडकीस आली असून या सांगाड्यावर काही प्रमाणात मांस आढळून आले. हा सांगाडा अंदाजे ३५ ते ४० वर्षाच्या व्यक्तिचा असल्याचे बोलाले जात आहे. मात्र, अद्याप पुरुष की, महिलेचा आहे हे स्पष्ट झालेले नाही.

सांगडा मिळालेल्या परिसरात सेवाग्राम पोलिसांनी शोधाशोध केली. नदीकाठचा परिसर पिंजून काढला. एरवी या परिसरात कोणीच जात नसल्याने काहीही माहिती मिळाली नाही. त्यामुळे या सांगाड्याजवळ ओळख पटनारे कोणतेही ओळखपत्र किंवा कपडे आढळुन आले नाही. सेवाग्राम पोलीस ठाण्याचे ठाणेदार संजय बोठे यांनी स्टाफसह पंचनामा केला. त्यानंतर ओळख पटवविण्यासाठी सांगाडा सेवाग्राम रुग्णालयात शवविच्छेदनाकरिता नेण्यात आला.

सेवाग्राम रुग्णलायात होणार सांगाड्याची प्राथमिक ओळख

वर्ध्यातील सेवाग्राम रुग्णालयात या सांगाड्याचे शवविच्छेदन होणार आहे. येथील अहवालात मृत्यूचे कारण स्पष्ट होईल. मृत्यू किती दिवसांपूर्वी झाला होता, हा सांगाडा स्त्रीचा आहे की पुरुषाचा आहे हे सुद्धा शवविच्छेदन अहवालावरून कळणार आहे.

तपासासाठी अहवालाची प्रतीक्षा

पुढील तपास हा सेवाग्राम येथील फॉरेन्सिक रिपोर्ट वरून केला जाईल. मृत्यूच्या कारणावरूनच तपासाला दिशा मिळेल. अहवालाची माहिती येताच तपासाचे सूत्रे हलवत प्रकरणाचा खुलासा केला जाईल, अशी माहिती ठाणेदार संजय बोठे यांनी ईटीव्हीशी बोलताना दिली.

घातपात तर नाही ना?

नदीकाठच्या सुनसान परिसरात कुजलेल्या अवस्थेत असलेला हा सांगाडा आहे. त्यामुळे निर्जन स्थळी कोणी घातपात करून फेकला तर नाही ना? अशी शंका व्यक्त केली जात आहे. या भागात कोणी जात नसल्याने कदाचित दुर्गंधी पसरली नसावी असाही कयास लावला जात आहे.

पुढील तपास सेवाग्राम पोलीस ठाण्याचे सुदाम सुरजुसे, अमर करने डीबी पथकाचे सुधीर लडके, अनिल जिंदे, रविंद्र जुंगनाके, प्रवीण बोबडे, प्रभाकर उईके करीत आहे.