Sant Lahanuji Maharaj Sansthan Wardha: टाकरखेडाची 'ही' संस्था स्वतःच करते शेणापासून वीजनिर्मिती; चालविली जाते स्पर्धा परीक्षा अभ्यासिका

वर्धा जिल्ह्यातील टाकरखेडा येथील संत लहानुजी महाराज संस्थानमध्ये अडीच हजार किलो शेणापासून वीजनिर्मिती केली जाते. तसेच स्पर्धा परीक्षेची तयारी करणाऱ्या युवकांसाठी येथे अभ्यासिका देखील तयार करण्यात आली आहे. येथे 32 केव्ही वीज तयार केली जाते. वर्षभर सकाळ संध्याकाळ 500 लोकांसाठी जेवण तयार केले जाते.

वर्धा : जिल्ह्यातील टाकरखेडा येथे असलेले संत लहानुजी महाराज संस्थान हे शासनाचे 'क' दर्जा प्राप्त मंदिर आहे. संत लहानुजी महाराजांचे वास्तव्य या गावात राहिल्याने याच ठिकाणी त्यांचे 5 एकरात प्रशस्त मंदिर उभे आहे. अमरावती नागपुर महामार्गापासुन दक्षिणेस अवघ्या काही अंतरावर हे मंदिर संस्थान आहे. राज्यातील लाखो भाविकांचे हे श्रद्धास्थान आहे. या मंदिरात वर्षभर रोज सकाळी व संध्याकाळ जवळपास 500 नागरिकांना भोजन दिले जाते.

गोबरगॅसच्या माध्यमातुन स्वयंपाक :या भोजनदानाचे वैशिष्ट्य म्हणजे हे जेवण गोबरगॅसवर बनविल्या जाते. या संस्थेच्या जवळजवळ 450 गाई आहेत. याच गाईच्या शेणाचा उपयोग हा गोबरगॅसच्या माध्यमातुन स्वयंपाक बनविण्यासाठी केला जातो. याच गाईच्या गोमूत्रापासून व शेणापासून इथे गांडूळ खत, गांडूळ पाणी, गोमूत्रापासून फिनाईल, अमृतजल, दशपर्णी अर्क, निर्माल्य खत, कीटकनाशके आदी बनविल्या जाते.

युवकांसाठी सुवर्णसंधी :या ठिकाणी स्पर्धा परीक्षेची तयारी करणाऱ्या युवकांसाठी लहान अभ्यासिका तयार करण्यात आली आहे. येथे विद्यार्थ्यांना मोफत स्पर्धा पुस्तके, मोफत लॅपटॉप, कॉम्प्युटर, लायब्ररी, मोफत जेवण्याची व मोफत राहण्याची सुद्धा व्यवस्था करण्यात आली आहे. या ठिकाणी जवळपास 40 युवक स्पर्धा परीक्षेची तयारी करत आहेत. आजपर्यंत 10 युवकांची विविध क्षेत्रांत शासकीय नोकरीत नियुक्ती झाली आहे.

संस्थेचे वैशिष्ट्य :या संस्थानचे सर्वात मोठे वैशिष्ट्य म्हणजे ही संस्था निर्माण करत असलेली वीज आहे. मंदिराच्या संस्थांमध्ये 450 गाई आहे. त्यांच्यापासून रोज 2500 किलो शेण निघते. त्या शेणापासून त्यांनी गोबरगॅस तयार केला आहे. 105 घनमीटरचा हा गोबरगॅस आहे. यांपासून रोज 50 क्युबिक गॅस निर्मिती होते. यापैकी 12 क्युबिक गॅस हा येथे रोज शिकणाऱ्या अन्नाच्या स्वयंपाकासाठी वापरतात, या ठिकाणी रोज सकाळ संध्याकाळ 500 लोक जेवण करतात.

अशी होते वीजनिर्मिती :उर्वरीत गॅस जो शिल्लक राहत होता, त्याचे काय करावे? असा जेव्हा निर्माण झाला. तेव्हा संस्थेने पुण्याच्या एका बायोमेट्रिक संस्थेची तांत्रिक मदत घेऊन 12 के व्ही ऊर्जा निर्मितीचे संयंत्र याठिकाणी बसविलेले आहे. यासाठी 12 के व्हीचे जनरेटर आग्रा येथून आणण्यात आले आहे. रॉ गॅस आणून एच2एसच्या माध्यमातून स्वच्छ केल्या जातो. नंतर पाण्यामधून तो स्वच्छ केल्या जातो. नंतर पाण्यातून क्लीन करून तो जनरेटरला पुरवठा केला जातो. हे जनरेटर स्टार्ट बाय मोटार, रण बाय गॅस अशा प्रकारे काम करते. मग मोठ्या प्रमाणात हे जनरेटर 12 के व्ही वीजनिर्मिती करत असते. ही वीज संस्थेच्या विविध कामांसाठी वापरली जाते.