ठाणे- महाराष्ट्रात विशेष करून मुंबई एमएमआरडीए क्षेत्रात कोरोनाबधितांचा आकडा दिवसेंदिवस वाढतच आहे. त्यामुळे ३ मे नंतरही लॉकडाऊन वाढण्याची शक्यता वर्तवली जात आहे. त्या भीतीने मुंबई परिसरात मोलमजुरी करून राहणाऱ्या महाराष्ट्रातील मजुरांनीही आपल्या गावाकडची वाट धरली आहे.
माहिती देताना महिला मजूर
कोरोनाचा प्रादुर्भाव टाळण्यासाठी सुरवातीला २१ व त्यानंतर १९ दिवसांचा अर्थातच ४० दिवसांचा लॉकडाऊन ३ मे पर्यंत राहणार आहे. त्यातच मुंबईतील कंजूरमार्ग येथे झोपडपट्टीत राहणाऱ्या कुटुंबीयांच्या हाताला काम नाही, हाती पैसा नाही, त्यामुळे या कुटुंबीयांनी अकोला जिल्ह्यातील आपल्या गावाकडली वाट धरली आहे. मजुरांची ६०० किलोमीटरची पायपीट सुरू आहे. भर उन्हात डोक्यावर गाठोडे, कडेवर लहानग्यांना घेऊन मजूर कुटुंबांची भर उन्हातली पायपीट मन विषण्ण करणारी आहे.