भिवंडीत अंधश्रद्धेपोटी महिलेला मारहाण करून कापले केस; भोंदूबाबासह 3 साथीदारांवर गुन्हा दाखल

पीडित महिलेवर जादूटोणा करून तिच्यापासून पिच्छा सोडवण्याचा या दाम्पत्याचा मानस होता. आरोपी विनोद आणि भोंदूबाबाशी संगनमत करून त्यांनी पीडित महिलेला पूजेसाठी बसवले. मात्र, पीडित महिला पुजेसाठी बसत नसल्याने आरोपींनी तिला जबर मारहाण करून तिचे केस कापले .

ठाणे -अंधश्रद्धेपोटी एका २८ वर्षीय महिलेला जबर मारहाण करून तिचे डोक्याचे केस कापल्याची घटना भिवंडीतील अंजूरफाटा परिसरात घडली. पीडित महिलेने भोंदूबाबा आणि त्याच्या साथीदारांच्या तावडीतून सुटका करून घेत नारपोली पोलीस ठाण्यात तक्रार दाखल केली. याप्रकरणी, पोलिसांनी चार आरोपींविरोधात गुन्हा दाखल केला असून चारही आरोपी फरार आहेत. मनोज गोहिल, त्याची पत्नी जया गोहिल, विनोद चव्हाण आणि गुजराथी महाराज, अशी आरोपींची नावे आहेत.

पोलीस सूत्रांनी दिलेल्या माहितीनुसार, पीडित महिला भिवंडीतील कामातघर परिसरात पतीसह राहत होती. दरम्यान, आरोपी मनोज गोहिलशी तिचे प्रेमसंबध जुळल्याने ती आरोपी मनोज बरोबर राहू लागली. काही महिन्यांपूर्वी आरोपी मनोज विरोधात नारपोली पोलीस ठाण्यात पीडित महिलेने अत्याचाराचा गुन्हा दाखल केला. त्यानंतर आरोपी मनोज जामीनावर सुटून आला. त्यानंतर पीडित महिला पुन्हा त्याच्यासोबत राहू लागली.

हेही वाचा -सूर्यग्रहण अन् अंधश्रद्धा : कर्नाटकातील या गावात दिव्यांगाना पुरतात जमिनीत

आरोपीची पहिली पत्नी जया आणि पीडित महिला एकत्र राहत असल्याने त्या दोघींमध्ये सतत भांडण होत होते. त्यामुळे पीडित महिलेवर जादूटोणा करून तिच्यापासून पिच्छा सोडवण्याचा या दाम्पत्याचा मानस होता. आरोपी विनोद आणि भोंदूबाबाशी संगनमत करून पीडित महिलेला पूजेसाठी बसवले. मात्र, पीडित महिला पुजेसाठी बसत नसल्याने आरोपींनी तिला जबर मारहाण करून तिचे केस कापले. पीडित महिलेच्या तक्रारीनंतर नारपोली पोलिसांनी चारही आरोपींवर अघोरी कृत्य आणि जादूटोणा प्रतिबंधक कायद्याअंतर्गत गुन्हा दाखल केला आहे. या प्रकरणातील चारही आरोपी फरार असून पोलीस त्यांचा शोध घेत आहेत. गुन्ह्याचा अधिक तपास पोलीस निरीक्षक वाणी करत आहेत.