राईस मिलच्या मालकावर अज्ञात शुटरचा गोळीबार; मालक गंभीर

शहापूर शहरातील गंगारोड भागात रमेश अग्रवाल यांचा राईस मिल आहे. या राईस मिलमधून घरी जाण्यासाठी मंगळवारी रात्री साडेआठच्या सुमारास राईस मिलचे मालक रमेश अग्रवाल हे राईसमिल बाहेर उभ्या असलेल्या त्यांच्या दुचाकीवरून घराकडे निघण्याच्या तयारी होते.

ठाणे -शहापूरमधील एका राईस मिलच्या मालकावर दुचाकीवरून आलेल्या दोघा अज्ञात शुटर्सनी गोळीबार केल्याची खळबळजनक घटना घडली आहे. ही घटना शहापूर शहरातील गंगारोड परिसरात असलेल्या राईस मिलच्या बाहेरच घडली आहे. रमेश अग्रवाल (वय - ५९) असे गोळीबारात गंभीर जखमी झालेल्या राईस मिल मालकाचे नाव आहे.

त्यांच्यावर ठाण्यातील एका खासगी रुग्णालयात उपचार सुरु आहे. तर याप्रकरणी शहापूर पोलीस ठाण्यात अज्ञात हल्लेखोरांवर गुन्हा दाखल करून पोलिसांनी त्यांचा शोध सुरू केला आहे.

राईस मिलच्या बाहेर निघताच गोळीबार -

शहापूर शहरातील गंगारोड भागात रमेश अग्रवाल यांचा राईस मिल आहे. या राईस मिलमधून घरी जाण्यासाठी मंगळवारी रात्री साडेआठच्या सुमारास राईस मिलचे मालक रमेश अग्रवाल हे राईसमिल बाहेर उभ्या असलेल्या त्यांच्या दुचाकीवरून घराकडे निघण्याच्या तयारी होते. त्याच सुमारास दुचाकीवरुन आलेल्या दोन अज्ञात हल्लेखोरांनी अग्रवाल यांच्यावर जवळून गोळीबार केला. यावेळी त्यांचा मुलगा व राईस मिलचा वॉचमन उपस्थित होते.

अज्ञात शुटरची गोळी अग्रवाल यांच्या छातीत घुसल्याने ते जागेवरच रक्ताच्या थोरोळ्यात कोसळले. त्यांनतर गंभीर जखमी अवस्थेत त्यांना शहापूर मधील उपजिल्हा रुग्णालयात उपचारासाठी दाखल केले. मात्र, प्रकृती गंभीर झाल्याने पुढील उपचारासाठी काल रात्रीच्या सुमारास ठाणे येथे ज्युपिटर रुग्णालयात हलविण्यात आले आहे. सध्या त्यांच्यावर याठिकाणी उपचार सुरू आहेत.

हल्लेखोर दुचाकी टाकून पाळले -

अग्रवाल यांच्यावर गोळीबार करताच दुचाकीवरून आलेल्या दोघाही हलेलखोरांनी घटनस्थळी दुचाकी टाकून मुंबई - नाशिक महामार्गाच्या दिशेने पळ काढला. विशेष म्हणजे लाखोंची उलाढाल होत असलेल्या राईस मिल बाहेर सीसीटीव्ही नसल्याने त्या अज्ञात हल्लेखोरांचे पोलिसांना वर्णन समजू शकले नाही. तरीही पोलिसांनी आता हल्लेखोरांचा शोध घेण्यासाठी हल्लेखोर टाकून पळालेल्या दुचाकीवरून तपास सुरू केला आहे. दरम्यान, हल्ल्यामागचे नेमके कारण काय याचा शोध घेतला जात आहे.