ठाण्यात लोकलमधील गर्दीचे दोन बळी

ठाण्यात गर्दीच्या रेट्यामुळे लोकलमधून पडून एका विद्यार्थ्यासह वेटरचा मृत्यू झाला. जयेश विठ्ठल कुडव (वय-19, विद्यार्थी) आणि संतोष किर्ती कोहली (वय-27, वेटर) अशी मृतांची नावे आहेत.

ठाणे - कोपर-ठाकुर्ली स्थानकाजवळ गर्दीच्या रेट्यामुळे लोकलमधून पडून एका विद्यार्थ्यासह वेटरचा मृत्यू झाला. या दोन्ही घटना लागोपाठ घडल्या. जयेश विठ्ठल कुडव (वय-19, विद्यार्थी) आणि संतोष किर्ती कोहली (वय-27, वेटर) अशी मृतांची नावे आहेत.

मृत जयेश याने ठाण्यातून आसनगाकडे जाणारी लोकल पकडली. यावेळी लोकलमध्ये प्रचंड गर्दी होती. कोपर स्थानकाजवळ तोल जाऊन तो लोकलबाहेर फेकला गेला. यात त्याचा जागीच मृत्यू झाला. जयेश हा शहापूर तालुक्यातील मुसई (शेणवे) गावचा रहिवासी आहे. तो दिवा येथील शासकीय अभियांत्रिकी महाविद्यालयात प्रथम वर्षात शिक्षण घेत होता.

हेही वाचा - प्रेम प्रकरणात आडवा येणाऱ्याचा चिरला गळा, प्रियकरासह तिघांना अटक

दुसऱ्या घटनेत ऐरोली येथील एका हॉटेलमध्ये वेटरचे काम करणाऱ्या संतोष कोहली याचा मृत्यू झाला. संतोष मंगळवारी उल्हासनगरला आईला भेटण्यासाठी गेला होता. तेथून तो फास्ट लोकलने ठाण्याकडे येत होता. ठाकुर्ली स्थानकासमोर संतोष लोकलबाहेर फेकला गेला. यात जबर जखमी झालेल्या संतोषचा मृत्यू झाला.