ठाणे - मुंब्रा परिसरात भारतीय चलनातील बनावट नोटा घेऊन आलेल्या तिघांना मुंब्रा पोलिसांनी किस्मत कॉलनी येथे अटक केली आहे. ही कारवाई शनिवारी पहाटे ४ वाजण्याच्या सुमारास करण्यात आली. पोलीस पथकाने त्यांच्याकडून २ हजाराच्या ७८८ नोटा आणि १५ लाख ७६ हजारांच्या बनावट नोटा हस्तगत केल्या आहेत. तिघा आरोपींना न्यायालयाने ५ एप्रिलपर्यंत पोलीस कोठडीत ठेवण्याचे आदेश दिले आहेत.
शहाजी जाधव - एसीपी ठाणे पोलीस जोन कुमार छुन्नुलाल (वय ४१) ( रा. ग्राम अस्दुल्लापूर कल्याण, ता-नगीना, जि-बिजनौर उत्तरप्रदेश), मोहम्मद दिलशाद शराजउद्दीन (वय २६) ( रा. ग्राम-हरगांव चंदन, ता. नगीना, जि. बिजनौर, उत्तरप्रदेश) आणि जावेद अहमद शरीफ अहमद अन्सारी (३०)( रा. हबीबा मंजिल, दारूल फलाह मस्जिद जवळ, कौसा मुंब्रा) यांना पोलीस पथकाने ताब्यात घेतले आहे.
चौकशी केल्यानंतर त्यांच्याकडे २ हजाराच्या नोटांची ६ बंडले होती. त्यात तब्बल ७८८ नोटा होत्या. या बंडलामध्ये २ लाख ७६ हजाराच्या १३८ नोटा या ८CM२७०६१२ या सिरीजच्या होत्या तर २ लाख २२ हजाराच्या १११ नोटा या ०FD९९७२१२ सिरीजच्या, २ लाख ९४ हजाराच्या १४७ नोटा या ९CK०८७०४१ सिरीजच्या होत्या. २ लाख ७६ हजाराच्या १३८ नोटा ६EB०९९०६१ सिरीजच्या, २ लाख ७८ हजाराच्या १३९ नोटा या ०DH४५६८८२ सिरीजच्या, तर २ लाख ३० हजाराच्या ११५ नोटा या ४BP१२२३१३ या सिरीजच्या असल्याची माहिती पोलिसांनी दिली. या तिन्ही आरोपी विरोधात मुंब्रा पोलीस ठाण्यात भारतीय दंड विधान ४८९(क), ३४ प्रमाणे गुन्हा दाखल करण्यात आला आहे.
बनावट नोटांचे पश्चिम बंगाल कनेक्शन
निवडणुकीच्या पार्शभूमीवर सापडलेल्या या नोटा ही मुंब्रा पोलिसांची महत्वाची कामगिरी आहे. अटकेतील आरोपींकडून या नोटा त्यांनी कुठून आणल्या आणि कोणाला देण्यासाठी आणल्या, याचा सखोल तपास करण्यात येणार आहे. आरोपी जोन कुमार छुन्नुलाल व मोहम्मद दिलशाद शराजउद्दीन यांनी पश्चिम बंगालमधून आरोपी जावेद अहमद शरीफ अहमद अन्सारी यांच्या माध्यमातून या नोटा आणल्या होत्या. या नोटा निवडणुकीच्या काळात भारतीय चलनात चालविण्यात येणार होत्या. या प्रकरणी सखोल चौकशी करून पश्चिम बंगाल कनेक्शनचा पर्दाफाश करण्यात येणार आहे.
