ठाणे - मनसे अध्यक्ष राज ठाकरेंच्या माध्यमातून समाजात भीतीचे वातावरण निर्माण करण्याचा भाजपचा डाव असल्याचा आरोप समाजवादी पक्षाचे आमदार रईस शेख यांनी केला आहे. आमदार रईस शेख हे भिवंडी पूर्व या विधानसभा मतदारसंघाचे प्रतिनिधित्व करतात.
मनसैनिकांच्या राज्यव्यापी अधिवेशनात राज ठाकरे यांनी पाकिस्तान आणि बांगलादेशी घुसखोरांना हुसकावण्याचे आव्हान केले होते. तसेच तलवारीचे उत्तर तलवारीने, दगडाचे उत्तर दगडाने देण्याचे भाष्य केले आहे. यावर प्रतिक्रिया देताना आमदार रईस शेख यांनी भाजपवर निशाणा साधला.
हेही वाचा -'शिवसेना हिंदुत्व आणि भगवा मरेपर्यंत सोडणार नाही'
राज ठाकरे यांनी भाजपशी सलगी करण्यासाठीच हिंदूत्वाच्या अटी मनसेकडून पूर्ण केल्या जात आहे. मात्र, राज्यात अशा राजकारणाला जनता थारा देणार नाही. राज्यात शिवसेनेने उद्धव ठाकरे यांच्या नेतृत्वाखाली काँग्रेस, राष्ट्रवादी काँग्रेस, समाजवादी पक्षासोबत क्रांतिकारी सरकार स्थापन केल्याने भाजपने राज ठाकरेंना पुढे केले आहे. तसेच त्यांना पुढे करून समाजात भीतीचे वातावरण निर्माण करीत आहेत, असा आरोप आमदार रईस शेख यांनी केला आहे. तर भाजपसमोर राज ठाकरे झुकले हे दुर्दैव असल्याचेही ते म्हणाले.
