ठाण्यात बांधकाम व्यावसायिकाचा गुतंवणुकदारांना गंडा; बनावट कागदपत्रे बनवून विकल्या सदनिका

गुंतवणूकदारांना नोंदणी करून देण्यात आलेल्या सदनिका आणि व्यावसायिक गाळे बनावट कागदपत्रे बनवून अनेकांना विकल्याचा प्रकार ठाण्यात घडला आहे.

ठाणे- गुंतवणूकदारांना नोंदणी करून देण्यात आलेल्या सदनिका आणि व्यावसायिक गाळे बनावट कागदपत्रे बनवून अनेकांना विकल्याचा प्रकार ठाण्यात घडला आहे. याप्रकरणी संजय भालेराव आणि प्रतिमा भालेराव यांच्या विरुद्ध राबोडी पोलिसात गुन्हा दाखल करण्यात आला आहे. त्यांच्याकडे गुंतवणूकदारांनी तब्बल २२ कोटी ६४ लाख ७५ हजार रुपयांची गुंतवणूक केले होती.

बाधंकाम व्यावसायिकाने गुंतवणुकदारांना चांगल्या परताव्याचे अमिष दाखविले होते. याप्रकरणी तक्रारदार विजय नरोत्तमदास अग्रवाल (वय ७१ रा. पश्चिम अपार्टमेंट, दादर) यांनी राबोडी पोलीस ठाण्यात गुन्हा दाखल केला आहे. एस. डी. भालेराव कन्स्ट्रशन प्रा. लि, एस. डी. भालेराव असोसिएट आणि मेसर्स क्राऊन बिल्डर्स आणि डेव्हलपर्स या कंपन्यांविरुद्ध तक्रार दाखल केली आहे. त्यांनी गुंतवणूकदारांना मोठ्या परतीच्या रक्कमेचे अमिष दाखवून २२ कोटी ६४ लाख ७५ हजार रुपयांची गुंतवणूक करवून घेतली होती.

गुंतवणुकदारांना शासकीय नोंदणी करून रहिवासी सदनिका आणि व्यापारी गाळे देण्यात आले होते. त्याची बनावट कागदपत्रे बनवून ती कंपनीच्या मालकीचे असल्याचे भासवत सदनिका आणि व्यापारी गाळे दुसऱ्यांना विकण्यात आले. त्यातुन गुंतवणूकदरांची फसवणूक करण्यात आली. यातून २२ कोटी ६४ लाख ७५ हजार रुपयांचा चुना गुंतवणुकदारांना लावण्यात आला.

फसवणूक झालेली २८ कोटी ५९ लाख १९ हजार ४७० रक्कम व्याजासह परत मिळावी, अशी मागणी तक्रारदाराने केली आहे. राबोडी पोलिसांनी आरोपी बिल्डर्स अॅण्ड डेव्हलपर्सचे संजय भालेराव आणि प्रतिमा भालेराव यांच्या विरोधात विविध कलमांन्वये गुन्हा दाखल केला असून पोलीस अधिक तपास करीत आहेत.