ठाणे - "देव तारी, त्याला कोण मारी" ही म्हण खरी ठरवणारी घटना ठाणे रेल्वे स्थानकात घडली असून या घटनेचा संपूर्ण थरार सीसीटीव्ही कॅमेऱ्यामध्ये कैद झाला आहे.
३ डिसेंबरला रात्री साडे दहाच्या सुमारास जालना जिल्ह्यातील घनसावंगी येथे राहणारे बबन सोनावणे (वय ५५) हे फलाट क्र. ६ वरून फलाट क्र. ७ वर जाण्यासाठी रेल्वे रूळ ओलांडत होते. त्यांचे संपूर्ण कुटुंब फलाट क्र.7 वर असल्याने घाईघाईत रेल्वे रूळ ओलांडून जाण्याचा त्यांनी प्रयत्न केला. दरम्यान, कल्याणच्या दिशेने एक लांब पल्ल्याची रेल्वे येत असल्याचे त्यांनी पाहिले. बबन यांना रेल्वे रुळावर पाहताच ट्रेन चालकाने जोरात हॉर्न वाजवला, ज्याचा आवाज ऐकताच घाबरलेले बबन सोनावणे जागीच थबकले. येणारी ट्रेन त्यांना धडक देणार, असे वाटत असतानाच तिथे तैनात असलेले आरपीएफ कॉन्स्टेबल अनिल कुमार यांनी बबन यांना पाहिले. कुमार यांनी क्षणाचा विलंब न रूळांवर उतरत बबन यांचे प्राण वाचवले. कुमार यांनी स्वतःचा जीव धोक्यात घालून बबन यांचे प्राण वाचवल्याची ही थरारक घटना तेथील सीसीटीव्हीमध्ये कैद झाली आहे.