ठाणे - भिवंडीतील लाहोटी कंपाऊंड येथे कापड मार्केटमधील 'बंटी शॉप'मध्ये एका ग्राहकाचा मोबाईल चोरणाऱ्या सराईत चोरट्याला सीसीटीव्ही फुटेजच्या आधारे अवघ्या २ तासांमध्ये पोलिसांनी शोधून काढले. कृष्णा सुरेश पवार (२२, रा. चव्हाण कॉलनी, भिवंडी) असे या चोरट्याचे नाव आहे.
सीसीटीव्हीच्या आधारे दोन तासांतच लागला चोरट्याचा शोध
भिवंडीतील लाहोटी कंपाऊंड येथे कापड मार्केटमधील बंटी शॉपमध्ये शनिवारी सायंकाळच्या सुमारास, निशांत गणेश पाटील हा युवक त्याच्या मित्रांसोबत कपडे घेण्यासाठी आला होता. कपडे घेतल्यानंतर त्याने दुकानातील टेलरकडे ते शिवण्यासाठी दिले. त्यावेळी टेलर अंगाचे माप घेत असताना त्याने हातातील १५ हजार रुपये किंमतीचा मोबाईल कापडांच्या गठ्ठ्यावर ठेवला. ही बाब लक्षात येताच, संधी साधून चोरट्याने मोठ्या शिताफीने निशांतची नजर चुकवून मोबाईल घेऊन दुकानातून पोबारा केला.