तुझ्यासाठी बायकोला सोडलं अन् तू लग्नास नकार देतेस; असे म्हणत प्रेयसीला भर रस्त्यात बेदम मारहाण

विवाहित प्रियकराने प्रियसीला भर रस्त्यात बेदम मारहाण केल्याची घटना समोर आली आहे. याप्रकरणी महात्मा फुले पोलीस ठाण्यात गुन्हा दाखल होताच पोलिसांनी प्रियकराला अटक केली आहे.

ठाणे - तुझ्यासाठी बायकोला सोडलं आणि आता तू लग्नाला का नकार देतेस, असे बोलून एका विवाहित प्रियकराने प्रेयसीला भर रस्त्यात बेदम मारहाण केल्याची घटना समोर आली आहे. याप्रकरणी महात्मा फुले पोलीस ठाण्यात गुन्हा दाखल होताच पोलिसांनी प्रियकराला अटक केली आहे. अजित कनोजिया असे या प्रियकराचे नाव आहे.

पीडित तरुणी कल्याण पूर्वतील कचोरे परिसरात राहते. ती कल्याण पश्चिमेतील सर्वोदय मॉलमध्ये एका दुकानात कामाला आहे. ही तरुणी आपले काम आटोपून मॉलच्या खाली आली असता, आरोपी प्रियकराने तिच्याशी हुज्जत घातली. त्यानंतर तिला भर रस्त्यात बेदम मारहाण सुरु केली. काही नागरीकांनी मारहाण करणाऱ्या आरोपीला पकडण्याचा प्रयत्न केला असता, तो घटनास्थळावरून पळून गेला.

आरोपी अजित कनोजिया याचे काही वर्षापासून पीडित तरुणीसोबत प्रेमसंबंध होते. अजित हा विवाहित असूनही त्याचे या तरुणीसोबत प्रेमसंबंध सुरू होते. दहा दिवसापूर्वी आपल्या या प्रेयसीसाठी अजितने आपल्या पत्नीला सोडले होते. पत्नीला सोडल्यानंतर या तरुणीला वारंवार लग्नासाठी गळ घालत होता. तरुणीने त्याला लग्नासाठी नकार दिला.

प्रेयसीची भेट घेत, तुझ्यासाठी बायकोला सोडले आहे. तू आता लग्नाला का नकार देतेस, अशी विचारणा केली. त्यावरुन त्यांच्यात वाद झाला. या वादातून त्याने तिला मारहाण केली. या प्रकरणी पीडित तरुणीने महात्मा फुले पोलीस ठाण्यात तक्रार दाखल केली आहे. पोलीस अधिकारी दीपक सरवदे यांनी अवघ्या दोन तासात आरोपीला अटक केली आहे.