ठाणे - एकतर्फी समजल्या जाणाऱ्या ठाणे लोकसभा मतदारसंघातील निवडणुकीत आता चांगलीच रंगत आल्याचे दिसून येत आहे. मतदानाचा दिवस जवळ येऊ लागला आहे, तसतसा उमेदवारांचा प्रचार जोर धरू लागला आहे. ठाणे मतदारसंघातील उमेदवार आनंद परांजपे यांनी प्रचारात आघाडी घेतली असल्याचे चित्र सध्या पाहायला मिळत आहे.
परांजपे यांनी सकाळी मिरा-भाईंदर येथील शहीद कौस्तुभ राणे जोगर्स पार्कमध्ये जाऊन मॉर्निंग वॉक करणाऱ्या नागरिकांची भेट घेतली. तसेच ज्येष्ठ नागरिकांचे आशीर्वाद घेऊन प्रचाराला जोरदार सुरुवात केली. यावेळी आनंद परांजपेंनी तरुणांशी संवाद साधत तरुणांची मते जाणून घेतली. मिरा-भाईंदर येथील नागरिकांनी परांजपेंना शुभेच्छा दिल्या, यावेळी माजी आमदार मुज्जफर हुसेन देखील उपस्थित होते.