ठाणे- शाळेतून घरी परतणाऱ्या एका १० वर्षीय मुलीच्या अपहरणाचे प्रयत्न केल्याची घटना कोनगावात घडली आहे. मात्र, मुलीच्या सतर्कतेने हा अपहरणाचा डाव फसला असून मुलीने स्वतःची सुटका करून आपला जीव वाचवला आहे. या प्रकरणी कोनगाव पोलीस ठाण्यात अज्ञात बुरखाधारी महिलेच्या विरोधात मुलीच्या वडिलांनी तक्रार दाखल केली आहे. अलिया अमन पाटील (१०) असे अपहरणाचा प्रयत्न झालेल्या मुलीचे नाव आहे.
भिवंडीत महिला, युवती व शाळकरी मुलींच्या सुरक्षिततेसाठी भिवंडी पोलिसांकडून जनजागृती मोहीम राबविली जात असतानाच दुसरीकडे शाळकरी मुलींच्या अपहरणाचे अनेक प्रकार समोर येत आहेत. अलिया पाटील ही शनिवारी सकाळी दहा-साडेदहा वाजेच्या सुमारास शाळेतून घरी येत होती. त्यावेळी राहत्या इमारतीच्या गेटच्या बाजूला एक अनोळखी बुरखा घातलेल्या अज्ञात महिलेने तिचे दोन्ही पाय पकडले. त्यामुळे आलीया खाली जमिनीवर कोसळली. बुरखाधारी महिला पळवून नेण्याच्या प्रयत्नात असतानाच आलियाने सदर महिलेस प्रतिकार केला. यावेळी आलियाने प्रसंगावधान राखत अनोळखी महिलेला जोरात लाथ मारल्याने अज्ञात महिला देखील जमिनीवर कोसळली. त्यावेळी आलियाने या महिलेच्या तावडीतून आपली सुटका करून घेतली व घर गाठले.