ठाणे- कळवा येथील छत्रपती शिवाजी महाराज रुग्णालय प्रशासनाकडून झालेल्या हलगर्जीपणामुळे अखेर ठाणे महापालिका प्रशासनाने या रुग्णालयाचे डीन आणि अधीक्षक यांची तडकाफडकी बदली केली असल्याची माहिती मिळत आहे. याबाबत महापौर नरेश म्हस्के यांनी दुजोरा दिला आहे. नवीन डीन म्हणून डॉक्टर प्रतिभा सावंत यांची नेमणूक झाल्याचे सांगण्यात आले आहे.
कळवा रुग्णालयात उपचारासाठी आलेल्या रुग्णाचा मृत्यू झाल्यानंतर तो कोरोना बाधित आहे, की नाही याची खातरजमा न करता त्यांच्या नातेवाईकांना मृतदेह देण्यात आले होते. अशी घटना एकदा नाही तर तब्बल तीनदा कळवा रुग्णालय प्रशासनाकडून घडली आहे. प्रशासनाच्या या हलगर्जीपणामुळे ठाण्यातील कोरोना रुग्णांचा आकडा मोठ्या प्रमाणात वाढला आहे. याची दखल घेऊन अखेर ठाणे महानगरपालिका आयुक्तांनी या रुग्णालयाचे डीन आणि अधीक्षकांची तडकाफडकी बदली केली असून कळवा रुग्णालयाच्या डीन म्हणून डॉ प्रतिभा सावंत यांची नियुक्ती झाल्याची माहिती मिळत आहे.