अमावास्येच्या रात्री स्मशानात भुतांना आवाहन करत गटारी साजरी

भिवंडी तालुक्यातील नांदकर-बापगाव येथील स्मशानभूमीत विद्यार्थी भारती संघटनेतर्फे 'एक रात्र भुताची' हा आगळावेगळा कार्यक्रम साजरा करण्यात आला.

ठाणे- बुधवारी गटारी अमावस्येच्या निमित्ताने नागरिकांनी मांसाहार व मद्यपान करून हा दिवस साजरा केला. तर दुसरीकडे मात्र विद्यार्थी भारती या संघटनेतर्फे स्मशानभूमीत 'भूता भूता ये ये' असे आवाहन करीत 'एक रात्र भुताची' हा आगळावेगळा कार्यक्रम मध्यरात्रीच्या सुमारास स्मशानभूमीत साजरा करण्यात आला. तरुणांमध्ये भुताखेतांची भीती घालवावी. तसेच, मनात भोंदूगिरी ठासून भरलेल्या अंधश्रद्धा दूर व्हाव्यात, या उद्देशाने हा कार्यक्रम आयोजित करण्यात आला.

भिवंडी तालुक्यातील नांदकर-बापगाव येथील स्मशानभूमीत हा कार्यक्रम करण्यात आला. यावेळी स्मशानभूमी भूत-प्रेत, बुवाबाजी, बाबागिरी कशी समाजात पसरवली जाते याचे पथनाट्यातून सादरीकरण करण्यात आले. तसेच प्रबोधनात्मक गीते सादर करून भुतांना आव्हान करीत गटारीचा आनंद साजरा करण्यात आला. या कार्यक्रमात असंख्य महाविद्यालयीन युवक-युवती, पालकवर्ग सहभागी झाले होते.

विद्यार्थी भारती संघटनेच्या माध्यमातून मागील ५ वर्षापासून विविध गावातील स्मशानभूमीत हा उपक्रम राबवण्यात येत आहे. याद्वारे समाजातील अनिष्ट रूढी, अंधश्रद्धा, भुताची भीती घालवण्यासाठी विज्ञानाची कास धरून या कार्यक्रमाचे आयोजन करण्यात आल्याचे या संघटनेचे अध्यक्षा मंजिरी धुरी यांनी सांगितले.

स्मशानभूमीत मध्यरात्रीनंतर जाऊन विविध खेळ खेळण्यासोबत तेथे मांसाहारी जेवणाचा आनंद या उपक्रमात सहभागी विद्यार्थ्यांनी घेतला. या प्रबोधनातून त्यांच्यामध्ये एक वेगळाच आत्मविश्वास निर्माण होतो, असा अनुभव विद्यार्थ्यांनी सांगितले. तसेच समाजातील अनिष्ट अंधश्रद्धांना मूठमाती देण्यासाठी आपल्यापासून सुरुवात केली पाहिजे. यासाठी यासारखे उपक्रम खरोखर समाजोपयोगी असल्याची प्रतिक्रिया स्थानिक युवक मिलिंद जाधव यांनी दिली आहे.